Tin 2188 formulario ainda pa procesa di 2020
*Despues di basta aña a logra atende cu e retraso cu tabata tin
ORANJESTAD (AAN): Ta yegando na final di e procesamento di formularionan di restitucion di impuesto di aña 2020. Segun Directora di Departamento di Impuesto (DIMP), Luanne Gomes-Pietersz, el a haya un actualisacion di e cifranan.
El a indica cu tin 2188 formulario ainda pa procesa pa loke ta 2020. Mayoria di contribuyente lo a haya nan placa di retribucion di 2020 caba. Esnan cu no a hay'e ainda, e lo ta den proceso.
Tin algun contribuyente cu a bisa cu no a hay a 2017 of 2018 ainda. Nan por tuma contacto cu DIMP na 522-7424 y lo tuma nan datonan wak kico por a bay robes den e proceso. "E idea ta pa tur contribuyente tin tur su impuestonan regla te cu 2020. Manera cu nos caba cu 2020, e siman aki mi ta kere nos lo keda cla y mi lo anuncia esey oficialmente. Nos lo cuminsa tambe cu 2021", a bisa.
DECLARACION IB 2021
Segun Gomes-Pietersz, pa loke ta 2021 esaki mester a wordo entrega 3 di October cu a pasa. Esnan cu no a logra pa yena nan formulario y entrega nan formulario di Inkomstenbelasting (IB) 2021 no mester ansha pasobra nan a haya extension automaticamente door di DIMP te cu 5 di December 2022. Esaki ta e fecha final pa entrega e declaracion di IB 2021.
El a agrega cu a cuminsa cu 2021 a base di un 'FIFO System' (First In-First Out). Esnan cu entrega nan formulario tempran ta haya nan retribucion di 2021 tambe tempran. Tin esaki registra a base d fecha di entrega y a base di fecha ta bay cuminsa procesa esaki.
Finalmente despues di basta aña, a logra atende cu e retraso cu tabata tin den restitucion, e directora di DIMP a remarca.
