Diesocho empleado publico a ricibi Registracion AruBIG

Drs. Jayburtt Dijkhoff a splica:

ORANJESTAD (AAN) – Den entrevista cu DIARIO, drs. Jayburtt Dijkhoff, Cabesante di Instituto di Calidad na DVG, a elabora tocante e ceremonia cu tabata tin Diabierna ultimo, esta Dia 28 di Januari’22, unda a otorga Certificado di Registracion di AruBIG na 18 trahador publico.

Drs. Dijkhoff a señala cu esaki ta marca un cambio for di momento cu e Ley di AruBIG a pasa, unda esnan cu ta traha den Gobierno como medico, boticario, dentista, etc., ta haya mesun reconocemento cu esnan cu a studia na Hulanda, si nan cumpli cu tur e rekisitonan stipula na AruBIG.

E rekisitonan aki ta, entre otro, cu nan mester a studia den un Instituto reconoci, of si nan ta cay bao articulo 43 cu ta bisa cu si nan tin suficiente experiencia, no tin ningun keho riba nan, a pasa tur e screening y inspeccion tambe, e ora ey ta duna nan e reconocemento igual cu esnan cu a studia na Hulanda, Canada y Merca. Pa esnan cu a studia na Colombia y Costa Rica tin otro articulo, y esey ta haci cu Diabierna, e Instituto a duna dos tipo di reconocemento.

Drs. Dijkhoff a expresa cu esaki ta un logro pa esnan cu tin añanan trahando den gobierno, pa haya un reconocemento igual, y di otro banda tambe ta un reconocemento como servidor publico, cu a traha tur e añanan aki. Hopi di nan a base di permiso den pasado, aworaki ta haya un registracion mescos cu tur otro cu ta cumpli cu e rekisitonan stipula.

E empleadonan aki a wordo scogi pasobra specificamente nan ta traha den Departamento di Salud Publico (DVG), y tin tambe funcionario di Cuerpo Policial (KPA), KIA, IVA, kiermen, esnan cu specificamente ta traha den Departamento di Gobierno.