ORANJESTAD (AAN): Señor Diego Acevedo, un docente di ‘Sisstem Program’ di Universidad di Aruba,
den un entrevista recien cu DIARIO a duna informacion di un encuesta nacional cu tin como meta pa haya e sentimento di pueblo riba e cambionan cu mester haci riba adaptacion di cambio climatico. Simultaneamente cu demas pais den Reino, ta haci e encuesta aki cu e mesun meta.
Recientemente, Acevedo a menciona, e National Climate Resilience Council (NCRC) a publica un rapport pa midi con vulnerabel Aruba ta y a duna recomendacionnan pa e risiconan pa Aruba. E intencion di e encuesta ta pa haya sa di nos comunidad kico ta nan sentimento pa haya e miho forma pa proteha nos isla di e resiconan aki entre otro un horcan. Segun señor Acevedo, tin diferente manera pa proteha nos mes entre otro planta mata di mangel (mangroves).
Señor Acevedo a duna di conoce cu tin diferente factor cu ta contribui na cambio cilimatico y cu ta afecta nos. E encuesta ta dirigi mas riba con lo por adapta miho na esaki. Tur hende por participa na e encuesta nacional pa asina colecciona mas tanto data posibel pa haya miho idea ki rumbo por tuma pa mehora.
Durante un luna, por haya e link y un QR Code di e encuesta riba pagina di Facebook di Universidad di Aruba. Tambe studiantenan di Universidad lo ta acercando ciudadanonan riba caya pa haci e encuesta. E encuesta online y personal ta duna opcion pa scoge idioma di preferencia pa duna posibilidad na tur ciudadano pa participa.
