Diasabra tin evento grandi di tur Bikers special pa yuda Jairo Dania

Hasta invitadonan di exterior lo ta presente

ORANJESTAD (AAN): Un evento grandi ta planea pa tuma lugar Diasabra awor!  Den mundo Bikers riba e isla, e ta hasta wordo describi como esun “mas grandi y historico” pa Aruba!

   Esey ta loke Vladimir de Cuba a declara den un entrevista cu DIARIO, pasobra ta tur organisacion local di Bikers a uni, y ta pidi comunidad en general tambe duna yudansa, y tur esaki pa un bon causa.

   De Cuba a splica cu nan ta hayando hasta reaccion internacionalmente, y algun Biker lo ta viahando pa Aruba pa asina tey presente Diasabra awor den loke nan ta yama ‘We Ride As One For J-Rod’.

   E ta un actividad pa recauda fondo y yuda e conocido biker local Jairo J-Rod Dania.  Tabata na Maart 2022 cu Jairo a sufri un accident hopi severo cu su motorcycle.  El a ricibi hopi golpi cu na prome instante e diagnostico medico tabata devastador.  Esey ta encera cu probablemente nunca mas Jairo lo bin bek manera e tabata antes.  Tur esey tabata un golpi duro pa famia.

   Sinembargo Jairo den su diccionario no conoce “No por”, ni ‘Imposible”, y tampoco ‘Rindi su mes’.

   Jairo a demostra net lo contrario!  El a recupera y cuminsa bin bek na forma lento.

   Pesey e actividad aki ta uno di recauda fondo, pa yuda Jairo sigui cubri e gasto di revalidacion, como cu e costo ey ta hopi halto.

   Segun Vladimir de Cuba, e revalidacion ta necesario como cu esaki lo ta e sosten pa e progresa hopi mas den su recuperacion aki na Aruba mes.

   Debi na e accident pisa, Jairo a perde empleo y e costonan di revalidacion no ta cubri pa AZV.  Pesey awor ta tene e evento pa recauda fondo.

   De Cuba a splica, cu e proceso aki a cuminsa draai riba iniciativa di e Club Bende Van Zes cu a dicidi na pidi asistencia di demas clubnan di Bikers.  Unavez cu e otro clubnan a tende di esaki, tur a uni na e lucha.  Esaki ta demostra tambe e respet grandi cu nan tur tin pa Jairo Dania.

   “Jairo ta e tipo di hende cu ta laga su cosnan priva para un banda, pa e yuda otro.”  Jairo ta semper busca forma pa yuda tur prohimo cueste loke cueste.  E bon vibe aki ta visible ainda, mirando con bon e ta recuperando.

   “Mi ta kere e ta un milagro di Dios tambe,” Vladimir de Cuba a indica den e entrevista.

   Ride y Fiesta Diasabra: Vladimir de Cuba a indica cu Diasabra atardi pa 4:00 pm nan lo bay tin un Ride cortico, y esaki lo finalisa na Arena na Barcadera 1-A, unda lo tin varios banda tocando, e.o. banda tipico, gaita, banda di rock y tambe DJ.  Lo tin  monton di premio cu lo wordo rifa di cual ticket ta costa solamente 5 Florin.  Tin como 40 premio pa rifa.

   Si bo no ta core brommer mes, yega y contribui na esaki, como cu lo tin Bar & Cushina special.

   Grupo di Iron Order yegando: Jairo Dania mes ta pertenece na e club local di Iron Order, cu ta un organisacion internacional.  Iron Order na Merca a haya sa di e revalidacion di Jairo, y nan a dicidi organisa un recaudamento di fondo entre e miembronan.

   Hecho ta cu como 25 miembro di Iron Order lo bay ta Diasabra drentando Aruba cu un di e cruseronan cu lo mara na Waf di Aruba.  Nan lo baha y acudi na e actividad di “We Ride As One for J-Rod”, y lo trece e donacion tambe.

   E evento lo ta na Barcadera 1-A for di 4:00 pm te cu 12:00 am.