Diasabra merdia ainda parti di San Miguel tabata inunda

ORANJESTAD (AAN): E awacero torencial cu tanto Diabierna mainta, y despues tambe atardi a azota Aruba,

na algun lugar a dura mas di 1 ora yobiendo.  Otro lugarnan cu mainta a haya yobida, a haya nan obliga di wanta duro pa atardi a bolbe haya mas yobida.

   Awor a bin haya sa, cu na Aruba e careteranan ta wordo diseña na un forma cu ora tin un situacion asina di awacero duro den un par di ora, e awa ta baha den alrededor di 3 ora. Pa Aruba por tin un diseño di camindanan unda awacero cu cay ta baha den 1 ora, esaki lo trata di un diseño cu un inversion hopi mas grandi.

   Resultado di esaki ta cu varios area di e isla a keda bay bou awa, y trafico a keda core poco-poco pa pasa den e area. Incluyendo parti di Avenida Nelson Oduber, den area di San Miguel.  E zona aki a hasta bira igual cu un ‘Bubali Plas 2’.  A ser splica cu e awa aki su nivel a keda baha masha lento mes, cu ta un indicacion cu e yobida tabata basta fuerte.

   Servicio Meteorologico a indica cu desde Diabierna mainta 8:00 am te cu Diasabra mainta 8:00 am, e area Westpunt di Aruba a ricibi 1.5 mm di awacero.  Area di Piedra Plat a ricibi 9.5 mm.  Area di Aeropuerto a ricibi 4.2 mm.  Si acaso tabatin un rain-gauge instala na Bubali, e cifranan aki lo tabata extremo.

   Riba potretnan aki di Drone, por nota cu practicamente no por a pasa riba e caminda chikito cu tin pabao di e casnan na San Miguel pasobra nan ta full bao awa.  Riba Avenida Nelson Oduber, trafico poco-poco por a sigui pasa.