Biblioteca ta feliz cu mas obra local
ORANJESTAD (AAN): Un chens unico pa bo topa cu autora local cu ta lanzando un buki nobo.
E autora di buki señora Desiree Correa ta trece un otro obra pa su publico. E buki aki yama ‘Drama Real’ y diasabra awor lo tin un Book signing na Plaza Bookshop.
Riba portada di e buki por lesa un sinopsis di e storia: “E novela ta trata di un pareha locamente enamora, cu ta mira nan felicidad yega na alcansa un nivel halto cu yegada di nan morocho. E yegada di e dos muchanan Jani y Juani ta e colmo di felicidad pa e mama.
No pa e tata, kende ta sospecha cu su señora tabata infiel. Di ki otro manera bo por splica e aspecto fisico di rasa preto di e muchanan? Tanto wela como welo part’i tata tin desendencia Europeo, di unda anto e muchanan a sali cu cabey yen di krul cera y color di mispel? Comosifuera esaki no ta suficiente, e welo part’i tata ta un homber sumamente machista y ta discrimina no solamente color di cuero di un persona, sino tambe hende muhe”.
Biblioteca ta hopi contento cu señora Correa ta keda contribui na e mundo literario di nos isla y pronto e buki lo ta den circulacion pa nos miembronan por fia. E buki ta obtenibel na Plaza Bookshop. Si bo ta desea di combersa cu e autora y haya un firma/dedicacion den buki por bishita Plaza Bookshop diasabra awor, entre 11:00 am y 1:00 pm.
