Diasabra 26 di Februari lo tin 'Parada Nacional di Luz'

Minister Xiomara Maduro a anuncia 'Cend'e Mecha'

• Lo tin mesun ruta cu Carnaval di Playa 

ORANJESTAD (AAN):  Diabierna atardi, Minister Xiomara Maduro a anuncia e proximo celebracion nacional cual lo bira e 'Parada Nacional di Luz'. Esaki ta bay tuma lugar diasabra 26 di Februari di 8 pm pa 2 am.

E mandatario a duna di conoce cu e evento aki ta pa 'Cend'e Mecha' pa Carnaval 2023 y lo tin mesun ruta di e carnaval di Playa.  E gruponan cu subi caminda lo mester tin color di e bandera di Aruba.

E parada lo sirbi tambe pa e musiconan uza nan creatividad cu canticanan y musica nobo. Esaki ta danki na fondonan cu Oficina di Turismo a pone disponibel y cu ta den e pot di fondonan cu tur aña ta wordo poni pa carnaval di Aruba.

Minister Dangui Oduber a agrega cu mirando e flexibilisacion cu e strategia di salida ta nifica, a pensa pa organisa un actividad carnavalesco. A tene cuenta cu tur e aspectonan relaciona cu e pandemia y e ora a sinta pensa con por tene un parada carnavalesco pa asina pueblo por celebra den un forma responsabel y cu prevencion.

A reuni cu musiconan, CrisisTeam y tambe cu SMAC pa wak con por a hinca tur cos den otro den un tempo cortico, Oduber a señala. Despues di 3 aña cu no tabata tin ningun evento di carnaval, awor ta bay tin e parada aki pa pueblo por disfruta di dje, e mandatario a expresa.

CEO di ATA, Ronella Croes, a laga sa cu e dianan aki tabata tin varios dialogo cu entre otro SMAC y Gobierno.  For di aña 2011 ta bin duna aporte na SAC y esaki a bira consecuentemente tambe cu SMAC.

Pa Aruba, a bisa, esaki lo ta un propaganda tambe na nivel internacional, ademas di Aruba ta e prome isla den organisa un evento manera esaki y cu ta marca e caminda di bolbe bek na normalidad. Minister Maduro a duna di conoce cu e evento aki ta conta tambe cu aprobacion di Conseho di Minister.

El a finalisa bisando cu dialuna 28 di februari ta keda toch un dia liber y cu Departamento di Labor a publica esaki caba. Pa loke ta juli, unda lo tin programa caba realisa algun evento di fundraising, cu esaki no lo inclui dianan liber.