Wega di domino cu hospital ta wordo cera cu e dobel seis
*Ni Gobierno ni constructor por dicidi pa calidad di un hospital
*Consehero experto internacional Salud Publico mester bin dilanti
ORANJESTAD (AAN)- Informacionnan entorno e continuacion di e proyecto pa renobacion y ampliacion di Horacio Oduber Hospital ta sigui drenta y ta indica cu Gobierno Wever-Croes lo a logra continuacion di e trabounan.
Pa DIARIO, sinembargo, ni Gobierno cu finalmente ta financia e proyecto pa medio di su fundacionnan ni e nomber di e constructor ta importante den e calidad necesario di hospital, cu ta bay mucho mas leu cu un solo edificio.
E dobel seis cu mester cera e wega di domino cu a basha abou den caso di e hospital renoba, ta informacion concreto di kende y con a yega na e decision pa renoba y amplia e hospital.
Segun e base di un sistema di Salud Publico, no mundo politico ni mundo di inversion ta dicidi pa loke un Hospital mester ta.
Pa ehecuta un bon proyecto di hospital mester haci uzo di companianan experto den e ramo di Salubridad Publico y tur e loke ta basico pa por papia di un Salubridad Publico cu ta sirbi interes di bida di e Pueblo.
E constructor di e hospital no por ta asunto financiero pero mester ta directamente relata na e hecho cu ta trata di un hospital.
Importante ta bira awor pa Pueblo di Aruba wordo informa di e expertonan den e mundo di Salud Publico, cu ta companianan grandi cu ta haci uso di expertonan riba e tereno aki y no ta atende cu cinco ni cu cincuenta strea.
Expertonan riba tereno di proyectonan pa un hospital ta atende cu e necesidadnan y e posibilidadnan cu tin pa un proyecto cu ta sirbi e Pueblo y cu ta basa completamente riba estudionan cu no ta carga cu saber politico, pero cu saber di necesidad medico di un pais.
Riba tereno internacional ta topa cu expertonan cu ta entrega un hospital den cual e exigencianan pa cuido medico den hospital a base di e realidad di un nacion, ta bini dilanti.
Na momento cu a cuminsa traha riba e hospital, mester a atende cu organisacionnan internacional cu ta duna conseho con ta yega na un centro medico cu ta acomoda pashentnan y ta duna cuido entre cuatro muraya na e pashentnan.
Expertonan den administracion di Cuido Medico y Salubridad P{ublico, cu ta un ramo riba su mes, mester haci e estudionan necesario prome cu por cuminsa papia di un proyecto di hospital.
Na e momentonan aki Gabinete Mike Eman cu tin representante actualmente den Parlamento mester splica Pueblo di Aruba, cual ta e expertonan cu a entrega cual rapport den cual ta splica tur e necesidadnan cu mester tene na consideracion pa por a atende cu un hospital adecuado pa poblacion di Aruba.
Na prome lugar mester splica Pueblo awor pakico a dicidi pa renoba e hospital y no construi un hospital nobo a base di exigencianan nobo den un mundo di cambionan grandi riba tereno di Salubridad Publico.
Mester presenta na Pueblo di Aruba no e constructornan cu a pone bloki y cement, pero e plannan di expertonan riba necesidad di Hospital como un centro medico pa Aruba, cu pa cuminsa hamas mester tabata situa caminda e ta situa actualmente pero na un sitio cu mayor siguridad y cu tabata central.
Den ramo di Salud Publico sigur e localidad, e asesibilidad, e prijs di un acomodacion y servicio medico ta conta pasobra cuido medico mester accesibel pa tur hende riba tur tereno.
Peligronan di condicionnan natural cu por a evita hende yega e hospital, mester a wordo tene na cuenta mescos cu e forma pa alcansa hospital den bon y mal tempo.
Con ta ekipa e Hospital y kico ta necesidad material y di profesionalnan segun tempo moderno mester a bini dilanti cu bon comunicacion y sigur no cu un sistema cu por a wordo secuestra pa personanan y entidadnan te awe desconoci.
E prome expertonan cu mester a papia tabata e expertonan riba e funcionamento y loke ta necesario pa hospital por a funciona pa henter Arubqa a base di conocemento y ekipo presente.
Den henter e discusion cu a prevalece den e cinco streanan di hospital, e gran ausentenan tabata hustamente e grupo di personanan cu mester tabata tin voz decisivo den Salubridad Publico y Hospital, cu ta e administrador di Salud Publico, team internacional di personanan tan capacita cu hasta na paisnan grandi no por mira nan presencia den tur ciudad di paisnan.
Pa cambio bini den e situacion dramatico na hospital di Aruba, porfin mester busca e expertonan necesario, cu ta capaz di maneha y administra Salubridad Publico y ta un ramo special den e mundo di medicina pa nan conocemento di tur materia di dolor di cabez di hende pa e dolor di cabez pa ambulance yega, e dolor di cabez pa haya placa pa paga y e dolor di cabez pa personal medico por duna e cuido necesario na e sitio cu mester acomoda hende cu problema di salud y no strea.
DIARIO lo bolbe riba e aspecto aki cu ta determinante pa Aruba, cu tin e suerte cu Imsan a habri su portanan pa presta asistencia importante prome cu streanan a rementa na un proyecto renobacion Hospital cu casi a mata Salubridad Publico.
