DIARIO celebrando e di 40 aniversario di servicio di Aureen Werleman

ORANJESTAD (AAN): E siman aki, Redaccion di DIARIO a celebra e gran hecho cu 40 aña pasa, un trahador ehemplar a drenta den servicio di Agencia Arubano di Noticia, cu ta e cas editorial di e Matutino di pueblo, DIARIO.

   Ta trata aki di Aureen Werleman-Croes, kende despues cu Aruba a haya su propio y berdadero corant cu e gran esfuerzo di Jossy Mansur y su esposa Nuhad Mansur, a aplica pa trabao y a cuminza cu su carera den mundo periodistico.

   Tabata riba 4 di Januari 1982 cu Aureen a cuminza cu trabao pa tur dia presenta noticianan fresco pa pueblo por lesa.  Hunto cu DIARIO, claramente Aureen a sostene e bienestar di un Pueblo.  El a uni na e filosofia, cu cada persona, cu a bati na porta di DIARIO sa cu nan a haya atencion semper y cuando nan tabata realmente busca e obhetivo di Pueblo.

   Aureen durante su carera a profundiza su mes den tur ramo di noticia, y tabata duna guia na fotografonan riba detayenan importante cu cada uno tin di busca riba caya pa asina informa lectornan.

   Pues semper trahando riba noticianan cu sea ta comparti alegria y tristeza, fiesta y dolor di Pueblo pero tambe di cada ciudadano.

   Claro cu Aureen tambe a pasa den e lucha cu DIARIO a hiba pa asina Aruba a haya su libertad.  E lucha pa evita cu forzanan aheno lo por a silencia boca di pueblo, y sigui apoya comunidad pa exigi nan fair-share den Reino Hulandes.

   Den su trayectoria, Aureen a ricibi hopi admiracion di gerencia y pa tal motibo tabata wordo apunta pa su creatividad y inovacion, door di crea seccionnan special, ideanan di mercadeo, y eventonan unico cu DIARIO tabata pone enfoke riba nan.

    Aureen tambe ta un di e personanan balente cu a traha na DIARIO, y ta agradecido na tur e apoyo, y sosten cu el a ricibi pa a haci e trabao cu algun biaha tabata hasta duro.

   Claro cu e trabao ey ta un di e motibonan pakico DIARIO a bira matutino di Pueblo. Pasobra ciudadanonan sa cu tin personal atento cu tey pa defende nan, y esey ta conta na final di dia.

   Gerencia di DIARIO un biaha mas ta felicita Aureen Werleman-Croes cu su 40 aña di servicio.  E ta sigur un logro di un lucha, perseveranza, y di comparti cu un Pueblo!