Diabierna mainta tabatin e vuelo inaugural di Jetair Caribbean  cu ta conecta hunto e Islanan ABC

Robert Maas, CEO:

ORANJESTAD (AAN) – Diabierna mainta a tuma lugar e vuelo inaugural di Jetair Caribbean, unda nan ta conecta Bonaire, Curacao y Aruba, hunto.

Señor Robert Maas, CEO di Jetair Caribbean, den entrevista cu DIARIO, a comenta cu aña pasa nan a cuminza cu e ruta entre Curacao y Aruba, pero aworaki nan a haci en combinacion cu Bonaire.

E enfoke ta cu e pasaheronan por yega e islanan ABC y hopi importante ta cu e conexion directo cu Aruba y Bonaire tey aworaki, loke normalmente no tabata asina, sino via Curacao.

Awor nan ta bula for di Curacao, Aruba, Bonaire y bek Curacao y viceversa. E vuelo special aki ta riba Diabierna conectando directamente e ruta Bonaire-Aruba-Bonaire, señor Maas a señala.

“Naturalmente, door di e manera con nos ta bula Curacao-Aruba y Curacao-Bonaire, tur ta combina asina” Maas a bisa.

Ta trata aki di dos vuelo pa siman. Un ta riba Diaranzon y e ta sali atardi di Aruba y ta bay Bonaire pa bay Curacao, y Diabierna mainta ta bula contrario, e ta cuminza na Bonaire bin Aruba, pa despues bay Curacao, señor Maas a splica.