Dia 5 di November a conmemora Dia di Resistencia Nacional y di Reino na Museo Arkeologico Aruba

Pancho Geerman, director interino di MANA:

ORANJESTAD (AAN)—Diamars 5 di November awo, a tuma lugar e Conmemoracion di Dia di Resistencia Nacional y di Reino y di tur luchado durante e di dos guera mundial. A recorda tambe e fusilamento di Boy Ecury 80 aña pasa.

E ceremonia aki a tuma lugar den Museo Arkeologico Nacional Aruba (MANA), na Schelpstraat 42.

Den entrevista cu Pancho Geerman, director interino di MANA, el a splica cu e anochi aki tabata tin dos elemento e hecho cu 80 aña pasa Boy Ecury a ser fusila, y tambe ta reconoce tur e luchadornan di resistencia durante e di dos guera mundial.

Geerman a duna di conoce cu a invita pa e ocasion aki, cuater artista cu tur tin vinculo cu Aruba, y nan a traha obranan unico cu e tema Libertad.

Pues, esaki tabata un anochi di sorpresa den sentido cu tabata tin algo di arte, pasobra arte ta importante pa comunicacion, poesia, un monologo, y tambe un exposicion di esclavitud cu ta unico, y ademas arte di artistanan contemporaneo.

E exposicionnan lo keda habri durante un luna, pues, te cu dia 5 di December. MANA ta habri di Dialuna pa Diabierna, di 9’or di mainta pa 5’or di atardi. Si tin gruponan cu kier bishita esakinan por haci peticion pa grupo via website di Museo Arkeologico Aruba.