Di Diasabra caba ta cuminsa cu siman di Lantamento di Mucha

Yvonne Bermudes di Comision Vision Pedagogico

• Dia Internacional di Derecho di Mucha celebra riba Diasabra
• E ta atardi na Aruba Carnival & Entertainment Village 

ORANJESTAD (AAN): Directora di Centro pa Hoben y Famia, esta Yvonne Bermudes a trece informacion di Comision Vision Pedagogico, cu ta consistiendo di diferente instancia trahando ariba tereno di lantamento di Mucha manera: Tienda di educacion, Fundacion Respetami, Fundacion pa Nos Muchanan, Wit Gele Kruis y Departamento Asunto Social conhuntamento cu Ministerio di Justicia y Asunto Social y Comicion Derechonan di mucha ta organizando pa  di 6 aña e Siman di Lantamento di Mucha combina cu e Celebracion di Dia Internacional di Derecho di Mucha. Durante e siman aki tin diferente aktividadnan di diferente organizacion cu por wak mira e kalender.

   Segun Bermudes, nan kier duna atencion e aña na e articulo nr 31 di Derechonan di Mucha, cual ta pone enfasis ariba e derecho di muchanan pa tin tempo liber y di por tin tempo pa hunga ariba un forma recreativo. Pa medio di nos aktividad nos kier stimula e hungamento sano y pafor pa tur muchanan.

   Nos kier haci un invitacion na henter comunidad, vooral nos muchanan pa bin celebra: (*) Diasabra 18 di November. (*) Carnaval Village na San Nicolas.  (*) E orario ta di : 3or di atardi pa 7or di anochi. (*) Lo tin diferente actividad: Dino jumps, Carousel, Roulette, Rollerskating, Hotwheels, diferente weganan, Facepainting, popcorn gratis, raspao y cotton candy pa tur muchanan cu yega tempran.

   Lo tin show di grupo di baile Dazzling group, un grupo di karate y tambe show di cacho Fluffy Paws.

   E aktividad aki lo ta combina cu e marcha di nos muchanan, “Marcha pa nos derecho” cu lo sali 3or di atardi for di YMCA San Nicolas y lo cana den e cayanan di San Nicolas y termina na Carnaval Village.

   Diferente instancianan di e Comision Vision Pedagogico lo tey pa combersa y ofrece sosten na mayornan cu cualkier pregunta ariba tereno di lantamento di mucha. E kiosknan di Carnaval Village lo tin nan dushi kumindanan na benta pa tur e mayornan.

Nos kier gradici Cede Aruba, Departamento Asunto Social y  gobierno di Aruba pa sostene e celebracion aki. Nos ta invita e comunidad en general especial nos muchanan pa bin celebra e Dia di mucha aki!