Director di DPL:
*Hopi local no kier traha den sector di construccion
ORANJESTAD (AAN): Ronny Irausquin, director di Departamento Progreso Labotal (DPL) a indica cu den bista por wak cu lo tin cu trece hende di afor si mira e trabounan cu ta bay tin. E ta kere cu di awor pa fin di aña ta bay haya masha hopi hende mes cu lo mester bin cu nan di afo.
No kier bisa esey, pero esey ta e realidad, a remarca. A sigui bisa cu mirando cu tin dos hotel grandi cu ta bay habri nan porta, un na San Nicolas y otro na Eagle Beach y tur e construccionnan cu ta andando, actualmente no tin hende local pa haci esey.
Den e parti di construccion, ta masha poco hende local tin ta haci e trabaonan ey. Tampoco e ta na altura si tin un scol na Aruba cu ta duna curso di por ehempel, pa forma un metzla. Irausquin a laga sa cu e no sa di e situacion y si e posibilidadnan ey tey ainda y si EPB ta duna e cursonan ey.
E director di DPL a enfatisa cu pa loke ta e parti di construccion, e no ta kere cu lo tin hende local actualmente buscando un trabao den e tipo di sector ey.
E pensamento di Minister di Labor ta pa unabes cu un persona ta na Aruba caba y ta trahando cu un compania, cu ta mas facil pa e compania haci un peticion pa permiso pa e trahado. Si tin hende na Aruba mes caba, no ta mira e motibo pa bin cu hende di afo, a expresa.
Ta depende di cuanto hende tin na Aruba cu no tin un permiso, pero cu ta trahando y si nan ta suficiente.
Ronny Irausquin a laga sa cu e trahado, cu no tin permiso mes, no mag di bay DPL pa haci e peticion pa trabao. Solamente e compania, e dunado di trabao ta acerca DPL of ta haci esey pa medio di un tramitado.
DPL ta intermedia pa trabao pa hendenan cu paspoort hulandes y local so, a enfatisa. Un hende cu ta di afo, e peticion pa su permiso di trabao mester bay a traves di e compania cu ta bay firma p'e.
A indica cu si tin companianan cu ta dispuesto pa firma pa nan. Pero tambe ta haya compania cu no ta dispuesto pa firma. Nan ta laga nan traha un rato y despues ta laga nan bay.
