Destruccion di Antonov-225 cu ta e avion mas grandi di mundo cu tambe a ateriza na Aruba

ORANJESTAD (AAN): Den pasado el a yega di ateriza na Aruba pa asina trece pieza vital pa refineria di San Nicolas. 

El a yega di trece un asina yama “Package Boiler” di emergencia for di Merca pa refineria na Aruba.  Tambe el a yega di trece un “Gas Turbine” pa e refineria.

   Ta trata di e avion di mas grandi di mundo, esta e Antonov-225.  Un avion cu seis motor poderoso, cu por yude transporta cargo hopi pisa mes.  E tin un maximum takeoff weight (MTOW) di 640 ton, y pesey e ta un di e avionnan mas pisa di mundo.  E tin hasta e nomber “Mriya” door di su fanaticonan mundial.  Unda cu ta, sea den dia of anochi e avion aki ateriza of lanta vuelo, bo ta haya centenares di hende para pafo di Aeropuerto cu kier mir’e of saca potret.  El a crea un grupo di fanatico desde cu el a haci su prome vuelo na aña 1988.

   Solamente un Antonov-225 a yega di wordo construi door di Antonov Bureau, cu ta un fabricante di avion cu sede na Ucrania.  E tin un ruman mas “chikito”, esta e Antonov-124 cu ta di 4 motor, y tin un maximum takeoff weight di 402 ton.   Aunke e An-225 tin un solo so construi, por nota cu An-124 si desde 1982 te cu 2004 a wordo fabrica 55 di dje.

   Recientemente durante e Pandemia, e avion An-225 aki a yuda masha hopi mes pa transporta material di prome necesidad, pa frontliners na diferente pais cu tabatin mester urgentemente di material medico, y di proteccion personal den Hospitalnan.

   E avion aki tin un famoso piloto tambe cu ta bula tanto e An-124 y tambe An-225.  Ta trata di Dmytro Antonov kende tin un canal riba YouTube, y e ta pone hopi video di su viahenan, incluyendo uno recien na aña 2020 ora cu nan a usa e avion mas chikito (124) pa transporta material for di Eindhoven (Hulanda) te cu Curacao pa asina yuda localiza y hisa e Helicopter Hulandes cu a cay y sink den lama pabao di Aruba.

   Ataca y destrui door di Rusia:

   E noticia di mas espantoso a cuminza circula siman pasa caba, cu fuentenan ta bisa cu nan tin informacion cu e avion tan keri, esta e Antonov-225 a wordo destrui sea Diahuebs door di forzanan Ruso.  Pero e informacion ey no por a wordo confirma.

   Hopi hende a puntra, pakico e Antonov Bureau no a manda e avion aki bay ‘parkeer’ na un otro pais sabiendo cu Vladimir Putin lo kier invadi y ataca Ucrania.  Pasobra varios aerolinea na e pais desde dos siman pasa caba a manda tur nan aparato bay parkeer sea na Spaña of na Francia.

   Diripiente Dmytro Antonov a pone un mensahe riba Social Media, cu e avion Antonov-225 ta safe y cu e tin informacion cu nada a socede.

   Sinembargo den fin di siman, e Ministro di Relaciones Exteriores di Ucrania, esta Dmytro Kuleba a confirma cu e avion Antonov-225 Mriya a wordo destrui durante un atake Ruso.

   E avion tabata djis staciona na Aeropuerto Hostomel, cu e lugar local cu Antonov Bureau ta usa como sede.  Mientras tanto un reportero di defensa cu sede na Kyiv, a bisa cu e avion a keda full destrui door di un atake Ruso.

   Dmytro Antonov riba un video publica Diamars a agrega, cu na e aeropuerto ey tambe e Rusonan a destrui un An-28, An-26, y An-74 tambe.

   Su historia valioso:

   Desde cu el a cuminza bula na 1988, el a wordo usa na comienzo pa transporta navenan espacial Sovietico.  Despues di caida di Union Sovietico, e avion aki a haya equipo di mundo occidental pa e por a cuminza haci viahe rond mundo, y cumpli asina cu tur regla di ICAO.

   Di e forma ey e avion a cuminza bira popular rond mundo, ora cu bo mester di transporta carga urgentemente, cu via di barco lo bay tarda hopi siman of luna.  E vuelonan aki ta costoso, pero danki na esey Antonov Bureau tabata gana un entrada basta stabil.  El a yega di yuda grandemente den transporte di yudanza humanitario durante crisisnan grandi di hambreza, of ora di tragedianan natural.

   Kico lo pasa awor?  Pa bay fabrica un Antonov-225 full nobo awor na 2022, lo bay costa sigur $1 biyon.  Esey ta demasiado caro pa un avion, y sigur lo no wordo logra.  Tin indicacion cu den pasado a yega di construi un 2ndo version di Antonov-225 pero parce el a keda cla solamente 70% y no tabatin placa mas pa keda cla cune.  Y awor cu Antonov Bureau por lo pronto lo no tin entrada mas tampoco, e chens pa fabrica uno completamente nobo, ta casi no-existente.

  Na Aruba tambe tin hopi fanatico di e avion aki cu awor a keda sumamente decepciona cu e avion a wordo destrui.