Natalie Geerman, director Avond Mavo:
*Pasobra e ta brindando bon resultado
ORANJESTAD (AAN) – Natalie Geerman, Directora di Avond Mavo, a bisa den entrevista cu DIARIO, cu despues di e periodo di Covid-19, nan a keda cu un trayecto di MAVO online cu cual nan ta hopi satisfecho pasobra e ta brindando bon resultadonan. Incluso tin dos miho graduado di Avond MAVO, y un di nan ta di online.
Nan ta sigui nan estudio na cas y unico momento cu nan ta bin scol ta pa haci nan test, sea CP of Examen. Y e ta brinda oportunidad specialmente na e grupo di hende muher, cu ta un grupo grandi, pasobra nan ta na cas y por wak pa nan yiu y toch bay nan lesnan.
Señora Geerman, contestando un pregunta, a indica cu tin hende ta realiza cu e bida no ta birando mas barata, y cu pa gana un salario un tiki miho mester sigui studia. Den e sentido ey hende ta bira mas conciente di esaki. Pero ta keda na cada ken pa tuma e curashi di bisa cu e ta bin scol bek.
E reto mas grandi di studia anochi ta combina e parti di trabao cu e parti di estudio, señora Geerman a menciona, pasobra hopi di e alumnonan aki ta traha. El a bisa cu manera el a trece dilanti den pasado, no tur doño di trabao ta coopera mesun facil.
“Nos ta keda apela na tur negociante na Aruba pa coopera cu e alumnonan. Pasobra na final di dia si bo tin un persona trahando, cu ta studia, e ta beneficia bo compania tambe”, Geerman a señala.
El a agrega cu si e studiante no tin e flexibilidad suficiente den dia e por studia anochi, y tin alumno cu ta bisa cu e no por tey tur anochi, anto nan ta studia riba nan mes un tiki mas self standing pero si, nan ta bin na e CP y Examen; esey tambe ta un posibilidad.
E studiantenan di Avond Mavo ta haya tur nan materialnan. En principio nan ta haya e bukinan, tambe e parti digitaliza, e docentenan ta pone tur cos online den classroom y si nan no ta logra bin anochi, nan por hacie self standing. Scol ta zorg pa tin e planning pa henter aña, pues nan sa exactamente kico nan mester studia y na unda nan ta.
Tambe el a indica cu un MAVO diploma ta e base minimo cu dunadornan di trabao ta pidi di un persona cu ta solicita pa trabao. Den e sentido ey e diploma ta yuda nan pa haya un trabao mas facil, pero e intencion ta pa e persona sigui studia, pues pa no stop. “Nos ta motiva nos alumnonan pa drenta Colegio EPI, por ehemplo, y nos ta topa varios di nos alumnonan bek, haciendo uso di e edificio di EPI, pues nan ta sigui”, Natalie Geerman a conclui bisando cu tambe tin alumno cu ta drenta Avond HAVO cu tambe ta un posibilidad.
