ORANJESTAD (AAN): Temporada di vakantie grandi a yega y hopi hende tin nan vakantie planea. Sea ta un vakantie recreativo, exotico of pa rason medico.
Na momento di bishita cualkier pais, ta hopi importante pa abo como biahero informa bo mes riba diferente aspecto di e pais cu bo ta bay bishita, manera e pais su clima, haltura, aspecto di higiena, calidad di su awa, e malesanan cu tin den e pais y con pa proteha bo mes di esakinan.
Biahero hopi biaha ta confronta problema di salud despues di a come alimento contamina durante su vakantie. Esaki por conduci na sacamento, diarea, dolor di stoma y keintura.
Pa e motibo aki Departamento di Salud Publico ta conseha pa na momento di come pa laba man bon prome, come cuminda cu ta
recien cushina y no cu a para pa basta rato, bebe awa di boter, laba fruta cu awa di boter of come preferibel frutanan cu bo mes mester casca.
Un otro peliger pa e biahero ta e insecto cu ta transmiti malesa. Tin diferente insecto cu ta carga virus of bacteria cu por haci hende malo. Pa evita di keda infecta cu malesa manera Dengue, Chikungunya, Zika of otro, DVG ta conseha pa bisti carson largo, blusa of camisa manga largo y hunta repelente contra insecto.
Planea bo vakantie 1 of 2 luna adelanta.
Si bo ta sufri di un malesa cronico consulta cu bo dokter prome cu bo biaha y si bo ta uza remedi bay cu extra.
Averigua si e pais cu bo ta bay ta exigi pa bo tuma cierto vacuna.
Y pa siguridad di bo mes y bo famia no lubida di cera un seguro di biahe.
Vakantie semper ta dushi y pa mantene asina nos mester tuma medidanan di precausion.
Pa mas informacion por tuma contacto cu Seccion di Malesanan Contagioso na Departamento di Salud Publico.
