Presidente di Comision Plan di Mayor:
ORANJESTAD (AAN) – Michella Steenvoorde-Lacle, Presidente di e Comision Plan di Mayor, den entrevista cu DIARIO, a bisa cu Dialuna 21 di November tabata un dia grandi, pasobra Parlamento a aproba unanimamente e Ley Plan di Mayor.
“Manera ta conoci e Ley Plan di Mayor ta encera cu tur mayor cu ta bay separa of divorcia, den futuro, mester traha un plan di mayor den cual nan ta stipula, con nan ta bay comparti e responsabilidadnan cu nan tin cu nan yiunan, den un documento legal. Pa nos e ta un satisfaccion hopi grandi pa a yega asina leu. Normalmente, un ley ta dura añanan largo, y toch esaki a dura desde 2018, cu nos a cuminza, te cu awor. Den un tempo relativamente cortico nos a logra esaki y pa nos, esaki ta hopi satisfactorio”, Steenvoorde-Lacle a reitera.
Michella ta añadi cu na banda di e ley ta bay tin trayectonan di cuido. “Ban pone cu si un mayor no ta yega na e Plan di Mayor su mes, pasobra e tin conflicto di comunicacion, etc., anto e no por deal di biaha, nos ta ofrece e ora ey mediacion gratis. E mayornan por meld na Locket Plan di Mayor, cu ta situa na Centro pa Hoben y Famia, na Wayaca. Eynan nos por schedule un cita pa wak con por yuda nan”, Michella Steenvoorde-Lacle a relata.
Michella a agrega cu e Comision Plan di Mayor a pidi un par di luna pa nan por cuminza funciona, pues 1 di Maart 2024 e lo bay oficialmente den funcion, pa nan por confirma cu Corte di Prome Instancia loke ta e verwijzing, pone e delaster puntonan riba “i” con nan lo bay traha cu otro.
“Pasobra mayornan por bin di nan mes, logicamente, pero nan por bin via Corte, of manda door di un instancia, pero con e ‘strong line’ lo bay ta lo cual nan ta bezig cu ne aworaki”, Lacle a indica.
El a aclarea cu tin diferencia entre Plan di Mayor y Voogdijraad. Esaki den sentido cu PdM ta preventivo y Voogdijraad ta curativo.
“Voogdijraad su rol ta bay ta manera semper, di duna Corte advies ora cu tin un caso cu rechter tin cu bay impone un decision” Michella a comenta, agregando cu Plan di Mayor ta yuda mayornan pa yega na un decision di nan mes.
