Despues di 8 aña un palo di Awacati a pari na un cas na Tamarijn

ORANJESTAD (AAN): Funcionarionan di Santa Rosa e siman aki a wordo invita pa haci un bishita na un cas situa den e bario di Tamarijn pa mira un mata di Awacati bon carga.

   E habitante señora Carmen Biesum sumamente orguyoso di su mata di Awacati awor bon carga faltando algun siman mas pa por haya Awacati fresco pa come.

   Sra. Biesum a conta esnan di Santa Rosa su experiencia, incluyendo con preocupa e tabata  cu su mata di Awacati no tabata pari. Un mata planta for di simia. Por poco nan a kita e mata paso dado momento a manera cambia di color y nada no tabata tuma lugar.

   Despues cu tabata tin otro intencion cu e mata a dicidi di no muha e mata mas. Ta net despues di esaki e mata a cuminda duna flor y diripiente ata Awacati a cuminsa forma.  Esaki por socede hopi biaha ora cu un mata ta “pensa cu e ta bay muri”, y ta core produci fruta.

   Cu un sonrisa grandi riba cara awor ta muhando su mata bek pa asina por tin un cosecha exitoso pronto y come su Awacati fresco for di su cura cas.

   Sra. Carmen Biesum no tabata desea di a para cu mic dilanti camera di Santa Rosa pa papia y splica, pero si a duna Santa Rosa tur credito pa yuda pueblo admira su mata di Awacati basta grandi y bon carga y pa por publica su bunita experencia cu e mata.

   Santa Rosa a gradici sra. Carmen Biesum pa invita nos pa admira su orguyo cu ta su mata di Awacati.  Pabien tambe di DIARIO.