Despues di 60 aña awor Reclassering a devela nan logo nobo

Tur miembro a duna input den su diseño

ORANJESTAD (AAN): Despues di mas di 60 aña di existencia, awor luna di Februari a habri cu e bon noticia cu Stichting Reclassering en Jeugdbescherming Aruba a haya un logo completamente nobo y fresco.

   E lanzamento aki a wordo haci dilanti nan sede den Caya Ernesto Petronia den presencia di e directora Seraida Pemberton, tambe secretario di Directiva, tesorero, y tambe a mira presencia di Parlamentario Alvin Molina, y un representante di Ministro di Husticia.  Fiscal mr. Schwengle di Ministerio Publico tambe tabata presente.

   Secretario Ebby Schwengle a mustra cu tabata 8 Mei 1961 cu Stichting Reclassering a wordo funda y durante e añanan ey e tarea importante di Reclassering a wordo efectua.  Den e cuadro aki, e empleadonan a haya un encargo pa bin cu un cambio di logo.

   E logo anterior na 1961 a wordo diseña door di detenidonan mes na Aruba.  Pero e nomber mes di e diseñador no a wordo memoriza.

   E biaha aki, e Relacionista Publico di Reclassering, esta e dinamico Francie Celaire a keda encarga pa coordina e trabao aki di bin cu un logo nobo.  El a splica cu e proceso pa bin cu e logo tabata uno extenso, y a envolvi tur trahador di Reclassering den esaki.  Pa un aña largo a bay-bin, haciendo encuesta entre nan, discuti y haci cambio.  Na final a yega na un logo caminda tur hende a pone nan ‘input’ como un team completo.

   E logo nobo ta un simbolo cu ta transmiti e mensahe di loke e trabao di Reclassering na encera.

   Esnan cu a traha e logo na final ta e yiu di tera Rodolfo Silva, hopi conoci na Aruba pero cu ta awor na Hulanda.  E ilustradora Joanne Maasdamme cu tambe ta yiu di tera, a forma parti tambe di e diseño grafico.  El a logra trece algo di e simbolo bieu bek, y forma asina un logo mas moderno.

   E logo ta representa loke tur e trahadornan na Stichting Reclassering kier a trece dilanti.  E develo di e emblema nobo na e edificio a wordo devela door di directora Soraida Pemberton, asisti pa Humprey Tromp (tesorero di Directiva), y Mercedes Levenston.