Departamento di DVG a atende workshop di PAHO te na Washington

ORANJESTAD (AAN): For di dia 15 te cu 19 di april, profesionalnan di Departamento di Salud Publico Aruba

(seccionnan epidemiologia, maneho den salud y promocion di salud) a atende un workshop di Pan American Health Organization (PAHO) na Washington DC.

   Na e workshop, e profesionalnan di DVG a duna presentacion di e resultadonan di e encuesta STEPS 2023; y tambe a presenta tur programa y intervencion den prevencion di malesanan cronico cu actualmente ta worde realisa pa diferente organizacion na Aruba.

PAHO a keda impresiona cu e maneho di Salud Publico na Aruba y con motiva y enfoca ta traha hunto cu su colaboradonan pa preveni, educa y promociona salud den diferente nivel.

   PAHO a ofrece diferente sesion na unda expertonan den diferente area, p.e. tabaco, a presenta estudionan haci den nos region, caminda tin programanan cu potencial pa explora na Aruba.

   Awo, Departamento di Salud Publico, tin e tarea pa finalisa e reporte y analisis di e data di e encuesta haci conhunto cu PAHO y CBS Aruba, pa un presentacion oficial di e resultado cu lo worde haci na Aruba den luna di mei den e sector di salud.

   Algun dato cu sigur a impacta ta e resultado di cifra pa loke ta referi obesidad, cual ta representa un reto significativo pa salud y bienestar di Aruba su poblacion. Sinembargo, cu esfuersonan conhunto y accion colectivo, esaki ta un reto cu lo por ser supera.

Departamento di Salud Publico lo ta trahando duro den e ultimo fase di e reporte di STEPS 2023 y ta spera cu e conocemento adkiri por yuda nos comunidad y nos profesionalnan den area di salud, pa implementa strategianan comprensivo cu ta trata e causanan fundamental di obesidad y ta duna poder na individuonan pa tuma decisionnan pa un bida mas saludabel.