Den transcurso di 24 aña di existencia a keda atrae mas studiante pa acudi na 'College Fair'

Muzanin Wever, lider di College Fair:

*A bin cu cosnan nobo y mas scol adicional 

ORANJESTAD (AAN) – Manera ta conoci, Diabierna tabata tin e apertura di College Fair 2024, na Renaissance Convention Center, na 2u 24 aña di existencia.

            Na aña 2000, tempo cu señora Mary Wever-Lacle tabata Minister di Enseñanza a cuminza cu College Fair, y ora cu el a hinke den un fundacion tabata tin otro persona cu a lidere, pero Muzanin mes ta lidera e Fundacion desde 2004, pues e aña aki tas 24 aña cu College Fair.

            Den entrevista cu Muzanin Wever, Coordinadora, el a comenta cu un cantidad di studiantenan increiblemente halto, a acudi na College Fair, locual a pone e organizadornan hopi contento.

E booths tabata completamente aborda pa hobennan y mayornan buscando informacion, y esaki na tur scol sea di Hulanda, Aruba mes, Caribe, Canada, Merca, Costa Rica, Aruba.

            Muzanin a comenta cu honestamente, atardi ainda e no a haya chens di pasa wak cual scol tin mas atencion, pasobra for di momento cu nan a habri porta pa 11’or a ripara cu e cantidad di studiantenan ta asina hopi, y cu den tur skina di e sala di Convention Center tabata tin studiante.

            E booth di Universidad di Aruba a resalta con grandi e tabata, cu informacion general y di e diferente facultadnan, y plannan pa futuro. “UA a show up” na manera “nos tey pa keda”, Muzanin a expresa.

            “E biaha aki Belgica no a bin. Aña pasa nos tabata tin Spaña tambe, pero tampoco tabata akinan e biaha aki. Mi ta spera cu e proximo biaha nan lo tey bek. Awendia e interes di nos hobennan pa tur rond di mundo eigenlijk no tin barera mas, no tin limite, no tin nada pa stop un studiante di bay studia unda cu kier pasobra hopi di e Institutonan hasta na Europa, cu ta papia un otro idioma tambe ta ofrece enseñanza na Ingles, pa hacie hopi mas facil”, Muzanin a menciona.

            Diario a puntra Muzanin si pa e siguiente College Fair nan lo por logra trece mas instituto for di mas pais di Europa, y el a indica cu for di trempan nan ta cuminza comunica, yama, papia cu nan y splica nan e importancia di Aruba, pero tin biaha ta tuma hopi largo pa convence nan bin na un pais chikito.

“Nos tin ambicionnan grandi, nos kier pa bin di tur parti di mundo, pero ora nan ta puntra nos cuanto studiante nos tin, y nos ta splica cu pa aña ta caba scol aproximadamente 300 studiante, p’esey nos ta haci e evento cada pasa dos aña”, Muzanin a menciona.

            El a agrega cu nan ta kere toch den Aruba su sistema di enseñanza, cu ta un sistema hopi solido, y esey ta haci cu hopi di nan toch ta bin Aruba. Italia ta un pais cu diferente di nos studiantenan kier bay studia ayanan (por ehemplo pa bira profesional den deporte), pero e no ta un pais cu conoce Aruba. Lo pasa hopi aña pa lobby cu ne, Muzanin a comenta.

            Den transcurso di e 24 añanan aki cu College Fair, hopi cos nobo a bin acerca; a trece scolnan adicional, y keda atrae e studiantenan pasobra mester move cu nan tambe y cu nan interesnan. Asina Muzanin a señala.