Den memoria di e gran cabayero y baluarte di Dakota Joe Dania

ORANJESTAD (AAN) – Tabata dia 5 di October, cu un redactor y un fotografo di DIARIO, a bishita e cabayero y baluarte di Dakota Joe Dania y su famia, en conexion cu su celebracion di su di 100 cumpleaño.

E dia ey tabata reina hopi alegria den su hogar, unda nan tabata preparando un brindis pa celebra e gran acontecimento aki, hunto cu famia, bisiña y conocirnan, despues di gradici Dios, cu un Santo Sacrificio di Misa.

Dia 31 di Januari 2022, kiermen, dos aña y 4 luna despues, Dios a tuma Joe den Su Reino. E noticia claramente, a trece hopi tristeza no solamente den seno di su famia, pero den henter pueblo di Dakota tan stima.

Sin duda ta un satisfaccion grandi pa su yiunan, cu nan a cuide manera e tesoro di mas balor cu nan por a haya den nan bida. E ta laga atras su yiunan Ingrid y Modesto Desarela- Dania, Joseito, Gladys, Rubia y Hubert Loopstok-Dania, Orlando y Marvis Dania, Eugene y Valeria Dania, y hunto cu nan, mas di 20 nieto.

Joe a brinda DIARIO un recorido hopi interesante, desde cu el a drenta scol basico na Playa, ya cu e tempo ey un scol so tabata tin, y a conta nos cu na un edad hopi trempan el a cuminza traha na Ecury Motors pa algun luna y despues el a drenta den Servicio Militar na Savaneta Kamp, unda el a biba un experiencia sublime: “Bon bisa, Savaneta Kamp a hacimi homber!” asina, Joe a expresa.

El a keda na Savaneta Kamp cuater aña  durante e temporada di e di dos guera mundial.

Despues di esaki el a bay Hulanda pa siña drecha meternan di awa unda e hunto cu otro mucha homber a bay Alemania contrata, y no solamente a siña drecha pero traha tur e meternan di awa mes, cual conocementonan el a transporta pa su Isla stima, Aruba.

Asina tambe el a construi un carera laboral di 40 aña na WEB Aruba NV, como hefe di Meter Dienst.

Un hecho bunita pa recorda ta cu Joe a pone e prome piedra pa e construccion di Misa Birgen di Fatima na Dakota y a keda semper como colaborado di e Misa, ganando reconocimento di Monsignor Luis Secco.

Joe tabata un defensor di e pilar yama Famia. Famia tabata su gran amor, manera e mes a expresa. El a casa cu señora Regina, un dama sumamente bunita, y hunto cune a forma un pareha hopi elegante. Nan a dura 55 aña casa, pasobra su esposa stima a fayece. Joe a keda na encargo di nan seis yiu, tres mucha homber y tres mucha muher.

E tabata defini su caracter como hopi simple, amante di orden, obediente na su hendenan y su filosofia tabata cu “ningun hende ta mas cu otro”.

Esaki ta un resumen di e entrevista cu DIARIO a haci cu Joe Dania, awe den feliz memoria. Dios duna su famia y tur cu a stim’e, hopi forza den e momentonan dificil aki. Cu Joe sosega den braza di Señor.