Den e caso di Natura Development tres hues imparcial a duna veredicto  

Minister Ursell Arends ta splica:

*Pa traha un beach den naturaleza proteha mester tin ontheffing 

ORANJESTAD (AAN) – Minister Ursell Arends, Minister di Transporte, Naturaleza, Integridad y Asunto di Adulto Mayor, a elabora den entrevista cu DIARIO, tocante e proyecto “Natura Development” y e beach pa Embassy Suites.

            E mandatario a splica cu mirando cu e caso a bay Hof, unda cu tres hues imparcial a dicta cu pa por construi un beach, mester pidi un ontheffing  y eynan ta caminda cu, anteriormente, tabata tin un discusion entre e desaroyador y Land Aruba. Y aworaki Ministerio di Naturaleza a indica cu pa nan por yega na un beach den naturaleza nan mester cana e caminda formal. Arends a bisa cu ley ta conta pa tur hende y cu pa haya un ontheffing mester pidi’e na Ministerio di Naturaleza.

            “Pa mi, como Minister di Naturaleza, esaki ta duna mi alegria pa mustra cu cualkier desaroyador akinan, mester tene cuenta cu prome bo bay construi, si tin especie proteha y si bo ta bay afecta nos naturaleza bo mester pidi un ontgeffing door di Ministerio di Naturaleza”, Minister Ursell Arends a reitera.

            El a subraya cu mas cu tur cos aki, nan a bay asina leu di analiza tambe kico ROPV y ROP ta dicta, y den e caso aki, unda ta trata di marine zorg, ta caminda unda no por construi un beach. “Pues, esey ta tambe loke e Hueznan a bisa y dicta den e veredicto aki”, e dignatario a subraya.

            El a agrega cu e problema den esaki ta, cu esaki ta un di e poco of di e unico areanan cu ta keda na Aruba, caminda cu bo tin e coral, e 'turtle grass', y tin e mangrove cu ta sobrebibi na un forma casi intacto. “Pues, nan ta na mehor estado y esey nan ta yama den tecnologia di naturaleza ‘e power of three’, unda bo tin tur tres eherciendo nan funcion p’asina aki aumenta nos biodiversidad, y e funcion cu nan tin den nos naturaleza”, e dignatario a señala.

            Esaki ta algo cu nos tur kier proteha, pero awo nos tin cu warda kico ta bay tin di e peticion cu ta bin. Y fuera di esaki tambe e desaroyadornan a dicidi di bay LAR y den esaki e minister tin tres luna di tempo pa contesta nan peticion y na su debido tempo, e lo haci esaki tambe, segun palabranan di Minister Arends.

            E dignatario a subraya cu ningun momento, como minister di naturaleza, su intencion ta pa bringa desaroyo. “Nos sa cu medio ambiente, desaroyo economico y naturaleza por bay man den man cu otro y akinan balance nan ta buscando, y den e caso di Natura Development nos a zorg pa colabora y traha hunto cu nan, pa nos yega na un solucion. Y ya caba nan tin Juanita Beach na nan disposicion, p’asina aki nan haci esaki accesible pa nan guest”, Minister Arends a duna di conoce.

            E dignatario a subraya cu por mira den comunidad cu ningun hende kier perde mas di nos naturaleza p’asina aki sigui desaroya y crece economicamente. “Pues, akinan nos ta buscando e balans y mi ta spera cu e solucion lo ta na beneficio di tur partido tambe”, Minister Ursell Arends a señala.