Delegacion di Parlamento di Aruba bishita representante di Aruba den Raad van State

ORANJESTAD (AAN): Como parti di su programa oficial na Hulanda, un delegacion di Parlamento di Aruba,

encabeza pa Presidente di Parlamento, Marlon Sneek, a haci un bishita oficial na representante di Aruba den Raad van State, señor Andy Lee.

Durante e encuentro, e delegacion a haya oportunidad pa intercambia informacion tocante e papel importante cu Raad van State ta desempeña den e sistema constitucional di Reino Hulandes. Tambe a brinda informacion amplio tocante e responsabilidad y tareanan cu Andy Lee ta ehecuta como miembro di Raad van State na nomber di Aruba desde 1 di januari 2024.

Segun Presidente di Parlamento, Marlon Sneek, e bishita a representa un oportunidad valioso pa amplia e comprension tocante e funcionamento di un di e institucionnan mas importante den Reino Hulandes y pa fortalece e relacion institucional entre Parlamento di Aruba y e diferente organonan constitucional.

“Como Parlamento, nos ta considera importante pa mantene contacto regular cu institucionnan cu ta desempeña un papel esencial den gobernacion y legislacion den Reino. E tipo di encuentro ta contribui na un miho comprension di e proceso di asesoramento, toma di decision y cooperacion cu finalmente tin impacto riba Aruba,” Sneek a declara.

Durante e reunion a discuti diferente tema di interes comun, incluyendo e papel asesor di Raad van State tocante legislacion, gobernacion y diferente asunto constitucional dentro di Reino Hulandes. E intercambio di informacion a brinda e delegacion un bista mas amplio di e manera cu e institucion ta opera y con Aruba ta wordo representa den e organo aki.

Lee, kende anteriormente a sirbi como miembro di Parlamento di Aruba y como Presidente di Parlamento entre 2009 y 2010, a comparti su experiencia personal y profesional cu e delegacion. Tambe el a ofrece aclaracion tocante e proceso di asesoramento y e dinamica di toma di decision den e contexto di Reino.

Presidente Sneek a expresa su aprecio pa e recepcion y apertura cu señor Lee a demonstra durante e encuentro: “Nos ta orguyoso cu Aruba tin un representante den Raad van State cu tin amplio experiencia politico y institucional. Su conocemento y compromiso cu Aruba ta un balor agrega importante den e institucion aki,” Sneek a señala.

E bishita ta forma parti di e esfuerzo continuo di Parlamento di Aruba pa mantene y fortalece e relacionnan institucional cu e principal organonan di Reino Hulandes. Segun Sneek, un bon entendemento mutuo y comunicacion habri entre e diferente institucionnan ta esencial pa promove gobernacion efectivo y cooperacion constructivo den beneficio di Aruba.