Defensornan di Clima den Caribe ta lansa proyecto pa impulsa resiliencia climatico

ORANJESTAD (AAN):  UNESCO a financia un proyecto nobo, ‘Tailor-Made Heat Maps for Caribbean Island States',

cu ta desaroya mapanan di calor personalisa pa paisnan insular den Caribe, cu ta sirbi como un herment importante pa resiliencia climatico.

            E proyecto a cuminsa cu reunionnan cu lidernan di proyecto, expertonan tecnico y Comisionnan Nacional di UNESCO di Aruba, Corsou, St. Maarten y Jamaica.

            E meta ta pa crea mapanan di clima, basa riba dato di temperatura di satellite pa analisa e temperaturanan local y duna support pa fortalece resiliencia climatico na e islanan aki.

            E proyecto ta pone enfasis riba e problema di calor extremo, cu ta menasa specialmente gruponan vulnerabel manera hende grandi, mucha na scol, usuarionan di transporte publico, y turista.

            Oriana Wouters di Aruba y Muskaan Khemani di Corsou, dos defensor di clima y hubentud, ta lidera e proyecto aki cu intension di haci e datonan di clima mas accesibel y viabel pa e islanan den Caribe.

            E colaboracion aki ta fomenta unificacion den e region, superando fronteranan colonial pa crea un futuro cu resiliencia climatico.

            Muskaan Khemani a enfatisa cu e datonan di clima ta esencial pa proteha e gruponan mas vulnerabel den nos comunidad y pa progresa cu e tema di resiliencia climatico.

            Di su banda, Oriana Wouters a bisa cu e proyecto ta haci cu e datonan di clima ta bira mas accesibel pa cada comunidad den nos region.

            E ekipo di proyecto tin sosten di Metabolic Foundation na Aruba y di 'Climate Rights and Justice International' (CRJI) na Barbados.

            Na e reunionnan di cuminsamento, a pone un fundamento pa e siguiente pasonan di e proyecto, cu ta inclui:

- Alcanco di Proyecto: Haci mapanan di calor cu ta contribui na decision den sectornan cu ta importante pa bienestar di comunidad.

- Rol di Comisionnan Nacional di UNESCO: Apoya na identifica stakeholdernan importante y duna sosten pa alcansa comunidadnan local.

- Compromiso di Stakeholders: Envolvimento di entidadnan di gobierno, gruponan civil, sociedad y comunidadnan local pa garantisa cu e proyecto ta satisface e necesidadnan local.

- Participacion di Comunidad: Un website y paginanan di social media lo wordo lansa, y un yamada pa encuestadonan local lo sali na Januari 2025.

            E proyecto ta planea pa culmina cu un tayer virtual cu ta duna training pa uzo di e mapanan y pa extende e impacto mas leu di e cuater islanan.

            Pa final di 2025, ta previsto e celebracion di un acto regional unda ta bay presenta e resultadonan di e investigacion.