Defensa Hulandes ta manda varios pomp poderoso pa Marinierskazerne

ORANJESTAD (AAN): Defensa Hulandes recien a dicidi pa manda pompnan mobil, cu ta wordo usa den caso di emergencia, pa Marinierskazerne na Aruba, y tambe Kazerna di Marina na Curaçao.

   Instituto Hulandes pa Seguridad Publico (Nederlandse Instituut voor Publieke Veiligheid (NIPV) a transferi tres pomp mobil di emergencia y nan baki cu slang perteneciente, na Brandweer di Marina. Dentro di poco tempo nan lo bay pa Curaçao y Aruba.  E sistema di containernan HCP aki ta destina pa e Marinierskazerne na e islanan.  Sinembargo ya a menciona cu den caso di emergencia, Cuerpo di Bombero local tambe por haci uso di nan na momento di inundacion.  Brandweer di Marina y NIPV a firma recien e acuerdo di transferencia.

   E pompnan mobil di emergencia por wordo usa den un situacion di emergencia (eminente), durante e temporada di horcan, por ehempel na momento di un inundacion. E pompnan ta adecua pa pomp y saca gran cantidad di awa.

   “Riba islanan di Caribe nan no tin e sistemanan aki”, Comandante en Hefe Adhunto di Cuerpo di Brandweer di Marina, Twan Langenhuizen a declara. “Esey tambe ta e motibo cu instructornan di nos tambe ta bay cu nan.  Nan lo bay instrui Brandweer local di ki forma nan mester opera e pompnan. Pa medio di e colaboracion aki, e ora tanto na Aruba y Curaçao lo tin personanan cu por usa e sistemanan.”

   Na Hulanda tambe Brandweer di Marina ta traha estrechamente cu Brandweer Civil.  Por ehempel durante coordinacion di calamidadnan y candelanan den e parti ariba di Noord-Holland.

   Screen contra azeta y scuma contra candela: Segun Langenhuizen, e pompnan ta un parti di un pakete mas grandi di recursonan cu ta bayendo Aruba y Curaçao.  Aki ta pensa riba screen contra azeta, y scuma contra candela.  Pa medio di cooperacion cu e cuerponan di brandweer riba e islanan, por proteha e kazernenan mihor sin cu mester manda personal eynan.”

   NIPV ta e Instituto di conocementu pa maneho di crisis y servicio di brandweer. E organizacion ta fortalece regionnan di seguridad, Reino y otro socionan di crisis cu investigacion, educacion, informacion y apoyo.