Dedicacion na memoria di Imelda Rustveld

ORANJESTAD (AAN): Di e conocido docente, MC, y presentador local Sonsito Croes, DIARIO a ricibi e relato aki dedica na memoria di e conocido Imelda Rustveld, kende recien a fayece.

   Cu e articulo aki, Sonsito ta desea di manda tur palabra di condolencia na henter famia di señora Imelda Rustveld y na tur cu a stim’e.

   “Mi tanatin sigur 8 aña di edad, tempo cu mi a scucha e nomber, scucha e bos y mira Imelda Rustveld su potret riba e caft di un disco LP na radio 1320 am, Voz di Aruba.

   Mi tata Addison Croes (dfm), E bos di Aruba, e tempo ey tabata disfruta di un sintonia respeta den su programa Festival Crioyo, dedica na Aruba su artistanan di canto y tambe algun internacional. Papi, manera mi tabata yama mi tata, tabata transmiti tanto cariño riba mi ora cu e tabata papia di e artista Arubano. E tabata hibami, casi tur siman, radio cu ne y hunto cu Juan Carlos Hill, nos tabata dicidi cua disco di cua cantante tabata tin cu toca.  Mi tabata permiti pa bay den studio 2 di Voz di Aruba y baha e Lp-nan abou y hiba algun pa Juan Carlos toca.

  Un di e LP-nan, cu nunca mi a lubida, tabata e Lp cu e 10 cantantenan Arubiano di ranchera, cu a representa Aruba, e aña ey na e festival di ranchera Antias, arasando cu tur premio cu por tawatin. Algun cantante cu mi por corda rib’e Lp ey tabata Vale Croes,  Yolanda van der Linden, Linda Wolf, Bubu Bislick, Bertha Croes y tambe Imelda Rustveld.  Apart cu mi tabata fan grandi di e musica ranchera,  danki na mi mama Josefa- y mi tata Addison Croes, di biaha ora mi a wak e potret di Imelda Rustveld compaña pa un fam cu mi a haya sumamente interesante, mi a bira fan.  Ora mi a laga Juan Carlos toca e cancion, mi a bira hasta mas fan ainda. E cancion dje Lp ey tabata e famoso cancion La Basurita, interpreta pa eo e cantantenan Mexicano Beatriz Adriana y Maria de Lourdes. La Basurita ta un di e cancionnan clasico di ranchera cu di chikito mi a gusta y scuchando Imelda interpret’e tabata motibo suficiente pa mi pidi Juan Carlos toc’e mas biaha den Festival Crioyo.

Añanan despues mi a bini back di Hulanda y 8 aña pasa, mi a topa Imelda, su yiu Milly, cu ya tabata un amiga di mi, y nan famia, den un restaurant na Boegoeroei. Aki mi a cera conoci oficialmente cu Imelda y nos a cuminsa papia cu e sa yiu di ken mi ta y cu hasta mi mama tabata den grupo di aguinaldo antes. Imelda y Milly a  bisami cu nan lo haya masha leuk si mi yega e siman siguiente nan cas na Cura Cabay y train cu nan grupo di aguinaldo cu yama “Flor di Pasco”. Mi a dicidi di tuma e reto y nos a train y presenta varios luga den temporada di Pasco. Mi a cera conoci tambe cu un grupo di cantantenan maraviyoso cu semper a tratami bon. Mi tawatin e honor di a graba den studio di Diego Henriquez y Danny Koolman, dos cancion, cu ta riba e cd ey. Semper mi lo keda agradecido na Imelda cu cada bes tabata anima nos pa saca e miho di nos.  E honor mas grandi tabata ora cu Milly y Imelda a honrami pa ta e padrino di e cd ey, hunto cu Nancy Ramos, cu a bini Aruba for di España na 2016.

E storia por continua, pero mi ta termin’e aki gradiciendo Imelda Rustveld pa tur e cariño y animacion brinda. Pa semper nos lo keda celebra y presenta e bos di oro di Aruba su reina di musica ranchera y aguinaldo den nos programanan navideño na Magic 96.5 fm cu Erin Croes. Pa Erin semper tabata un placer pa tawatin Imelda Rustveld den su programa Na Drempel di Fin di Aña p’e entrevistanan campeon. Esta un dama talentoso cu energia, Imelda tabata.

Danki Imelda, masha danki pa tur cos, forsa na su  famia stima, grupo Flor di Pasco, su amigonan y cu Imelda sosega trankil sabiendo cu cu el a laga un bunita stempel cultural y musical atras riba nos tur.