ORANJESTAD (AAN) – Pa conclui su participacion den e conferencia di prensa di fraccion di MEP, unda Parlamentario Arthur Vallejo a elabora tocante ArubBIG y Instituto di Calidad,
el a expresa palabranan di gratitud pa e pueblo di Aruba, Minister di Salud y henter su team. Ta cu nan sosten den e lucha aki, a logra AruBIG.
“Finalmente, mi kier a duna un danki na pueblo di Aruba. Mi ta corda cu mi mester a sali desvia un tiki di mi trabao diario den mi clinica, pa nos por drecha un problema cu tabata escalando di forma cu a crea discriminacion y hopi inhusticia pa cu nos profesionalnan yiu di tera; finalmente nos a logra, danki na e pueblo di Aruba, cu a apoya e lucha desde un inicio y cu a sostene mi persona sigur den mi prome carera politico, y nos por a tuma parti di e plan di MEP pa cu eleccion e tempo ey y cu despues a bira un plan di gobernacion, y finalmente danki tambe na e minister, full su ekipo, su departamento, cu a tuma e tempo aki hopi na serio. Y nos por a traha hunto pa nos por a logra yega, finalmente, na e gran logro aki cu ta e facilidad hopi mas profesional di e region pa cu Aruba”, segun Parlamentario Arthur Vallejo.
El a agrega cu specialmente awo den e crisis, hopi importante ta pa Aruba por tin su propio profesionalnan, pa por logra forma nan localmente, locual ta un proyeccion hopi importante cu e ta kere cu mester atende cune.
“E ta un parti tambe den e Landspakket cu Hulanda ta pidi nos, pa nos traha den e formacion di nos profesionalnan aki mes na Aruba, pero tambe pa nos bira mas fuerte den nos pais. So, e ta hopi importante cu sin nos hendenan nos ta debil, y no importa unda nan a studia pero si nan mustra cu tin un estudio di calidad, cu nan ta bon bini na Aruba, y nan por bin yuda nan famia, e poblacion di Aruba, etc. Esaki ta supremamente importante” Parlamentario Arthur Vallejo a subraya, pa conclui.
