Dakota a gana RCA cu 4-2 den prome wega di Playoff Final

ORANJESTAD (AAN): Diasabra anochi den Compleho Deportivo Guillermo Prospero Trinidad a cuminza cu e playoff final di Division di Honor 2021-2022. 

Fanaticonan tabata presente ora cu SV RCA a subi veld, pa enfrenta SV Dakota.

   Na e pitazo final, e team di Dakota a gana e wega cu score di 4-2.

   E prome goal e anochi a wordo anota pa Camilo Peña di Dakota na di 35 minuut.  Despues di esey, Sebastian Montoya di Dakota a haya chens di hisa e score cu 1 anotacion mas.   Na di 45 minuut, Francis Albert di RCA a haya chens y a anota un goal pa asina e score a drenta Half-Time cu 2-1 pa Dakota.

   Den di segundo tempo, Fernando de Sousa di Dakota a cobra un penalty na di 51 minuut, y esey a pone cu Dakota a pica bay dilanti cu score di 3-1.  Despues a toca turno pa Ricky Hodge di Dakota pa hinca goal na di 67 minuut.  E score e momento ey a bira 4-1 pa Dakota.

   Finalmente na minuut final, Jhon Silva di RCA a bay cobra un penalty, y esaki pues a pone cu e score a finaliza cu 4-2.

   Diaranson awor lo tin e Wega #2 di e Playoff Final den Compleho Deportivo Guillermo Prospero Trinidad.