Caribbean Guilder Cg. pa St. Maarten y Curaçao
ORANJESTAD (AAN): Manera DIARIO a trece dilanti caba, e dos islanan den Caribe, esta St. Maarten y Curaçao a cuminza draai e machine pa asina otro aña, esta dia 31 Maart 2025, nan lo lansa oficialmente e ‘Caribbean Guilder’ cu lo usa e symbolo di ‘Cg’ pa asina elimina esun anterior di ‘NAf’, cual ta un moneda cu ta existi desde 1952.
E organizacion ISO (International Standard Organisation) a caba di duna e Caribbean Guilder pa e union monitario di Curaçao y St. Maarten, e currency code ‘XCG’.
President Richard Doornbosch di Banco Central di Curaçao y St. Maarten (CBCS) a indica cu produccion di e monedanan nobo aki ya a cuminsa. Y esey lo socede, aunke tabatin un avalancha di critica di hendenan cu no a mira ningun necesidad pa introduci un moneda nobo na e etapa aki.
Crane Currency, Royal Canadian Mint ta produci y suministra e moneda nobo aki, di cual e produccion lo bay costa como 15 miyon Florin y financia door di Banco Central mes. E compania Canades lo bay fabrica e moneda, y tambe e placanan di papel.
E motibo pakico Banco Central di Curaçao y St. Maarten kier cambia di moneda, ta pasobra e Florin existente mester haya un update, debi cu su sistemanan di seguridad no ta actualisa mas, pues ta facil pa falsifica nan.
