Prome Minister Evelyn Wever-Croes:
ORANJESTAD (AAN): Diamars a tuma luga firmamento di e acuerdo mutuo (“Onderlinge Regeling”) entre paisnan den Reino y Hulanda. Na e ocasion, Prome Minister Evelyn Wever - Croes a tene un discurso den cual el a expresa cu e logro aki ta demostra cu e ta posibel pa den tempo dificil hiba combersacion cu otro como pais y pa yega na otro. Ademas e ta demostra cu ora duna otro espacio, respet, y scucha for di otro, cu esaki ta conduci na exito.
Tres aña pasa, Prome Minister Wever-Croes tabata na Hulanda na e mesun mesa pero den un circunstancia diferente durante pandemia. Aruba a worde impacta duro door di e pandemia, no solamente for di e perspectiva socio-economico pero tambe pa loke ta relacionnan di Reino. E pandemia a demostra e importancia pa inverti den otro y tambe e importancia di intensionnan sincero.
Locual cu Aruba, Curaçao, Sint Maarten y Hulanda a logra na bienestar di cada pais ta refleha e curashi cu cada pais a desplega den henter e periodo aki. E ta na cada pais awo pa tuma e responsabilidad y percura pa e reformanan cu tin cu tuma luga.
Na e ocasion Prome Minister a dirigi su mes tambe cu un mensahe di danki na comunidad di Aruba: “Danki pa boso dedicacion y trabao incansabel. Den temponan insigur nos a sobrepasa nos diferencianan, nos a uni pa hiba nos pais dilanti. Awe nos formalisa e trabao cu nos bin haci casi tres aña. Mi tin fe cu nos lo sigui ta exitoso den esaki.”
Finalmente, Prome Minister Wever-Croes a gradici Prome Minister di Curaçao Gilmar Pisas y Prome Minister di Sint Maarten Silveria Jacobs pa e sosten y dedicacion durante henter e proceso cual a conduci na e acuerdo cu a worde firma. Hunto a mustra e forsa cu como islanan chikito tin ora cu uni. Na Secretario di Estado Alexandra van Huffelen, Prome Minister a gradici'e pa a scucha y respeta cada isla. E ta keda na cada isla awo pa sigui atende cu e retonan y haci uzo di e oportunidadnan a base di respet y igualdad, Prome Minister a termina bisando.
Pa lesa e contenido di e Onderlinge Regeling, bishita e link aki:
Di e forma ey bo por keda bon informa.
