Declaracion oficial di Ministerio di Relacionnan di Reino
ORANJESTAD (AAN): Un boletin oficial emiti na Den Haag, ta mustra cu riba Diamars pa medio di e firma nan di minister-presidente di Aruba, Curaçao y St. Maarten y di Secretario di Estado di Relacionnan di Reino bou di e Acuerdo Mutuo a pone un base huridico pa colaboracion duradero pa reforma den e sector publico di e paisnan Caribense di Reino.
Ademas di e reformanan financiero, economico y social, ta trata aki tambe di reformanan den enseñanza, cuido y fortificacion di e estado di derecho.
E reformanan a bin ta tuma lugar e ultimo dos añanan a base di e landspakket di e paisnan Caribense. E meta ta pa mehora e resiliencia economico y forsa gubernamental di e paisnan na interes di e ciudadanonan. Esaki ta necesario, paso e pandemia di Corona a haci e vulnerabilidad di e paisnan pa golpi financiero y cu esey e necesidad tambe pa reforma.
E Acuerdo Mutuo nobo ta e instrumento cu lo uza pa un colaboracion duradero dentro di Reino. E acuerdo ta tuma e punto di salida di igualdad, propiedad y sentimento di comunalidad. Na mes momento tur partido tin un compromiso mutuo. Di e forma aki e gobiernonan di Aruba, Curaçao y Sint Maarten ta compromete nan mes pa traha riba e ehecucion di e reformanan pa e proximo cuater añanan. Hulanda na su lugar ta mara su mes na ofrece e sosten necesario den esaki. Esaki lo socede por medio di ponemento di capacidad di ehecucion y medionan financiero disponibel.
A base di e Acuerdo Mutuo nobo e paisnan Caribense di Reino, cada un riba nan mes, ta traha riba un plan di ehecucion hunto cu Hulanda. Den esaki lo inclui medidanan y proyectonan pa realisa e metanan cu tin na bista. E ehecucion di e reformanan primordialmente ta responsabilidad di e gobierno di e paisnan. E responsabilidad di coordinacion pa ehecuta e reformanan den e paisnan Caribense ta den man di e ministernan di Asunto General y e organizacionnan ehecutivo cu ta cai bou di esaki. Na Hulanda e responsabilidad ta cai bou di ministerio di Asuntonan Interno y Relacionnan di Reino y e ehecucion bou di e Tijdelijke Werkorganizatie (TWO).
E metodo ta riba e mesun liña cu e forma cu e paisnan den Reino a bin ta colabora cu otro riba e reformanan. E Acuerdo Mutuo ta bin na lugar di e consensusrijkswet COHO (Caribisch Orgaan voor Hervorming en Ontwikkeling).
{gallery}Aruba, Curacao, St. Maarten y Hulanda a firma acuerdo mutuo pa reformanan{/gallery}
