Crusero Insignia a bay haci un ‘test run’ riba lama pabao di Aruba

ORANJESTAD (AAN): Pa algun aña caba a worde specula, cu despues cu a basha Bushiri Beach Resort abao, lo bin cu algun facilidad di deporte di beach eynan, e.o. pa Beach Tennis, Beach Volleyball, Beach Soccer, etc.

   Pero esey no a socede.  E lugar ta djis cera pa auto no yega cerca di lama, y un desaroyo en general keto bay ta pendiente cualkier proyecto cu lo por bin eynan.

   E plannan pa un Hard Rock Hotel eynan tambe a muri.  Kizas tin di warda si acaso lo por inclui un proyecto extenso di Linear Park eynan.

   Diabierna mainta por a mira e barco MS Insignia net ora e ta regresando Waf di Aruba bek.  Esey ta debi cu e capitan di e barco aki cu ta ‘staciona’ na Playa, a bandona Waf pa bay dal un ‘test run’ y a bay te cu 12 miya pabao di Aruba, pa asina haci e chekeo regular si tur co sta OK.  Esaki ta algo cu e otro barconan staciona na Playa, esta esnan di Norwegian Cruise Lines tambe ta haci regularmente.

    Awor cu rond mundo tin mas y mas hende cu a vacuna nan mes contra Covid-19, varios compania crusero ta haciendo preparacion pa pronto cuminza nabega bek cu turistanan.  Por lo menos esnan di Royal Caribbean International ta bay exigi pa e pasaheronan tur a haya nan vacuna.  E tripulantenan di e barconan tambe ta wordo exigi pa nan tin vacuna pa por traha riba e barco.

      Riba e potret aki di fotografo Django, por mira momento cu tugboat ta dunando un man pa asina e barco MS Insignia di Oceania Cruises ta drentando waf bek.  E barco aki den pasado tabatin otro nomber, e.o. “R One” y tambe “Columbus 2”, y ta 180 meter largo y 25 meter hancho.  E por carga maximo di 824 pasahero, y 400 miembro di tripulacion.

   Pa awor, MS Insignia ta programa pa cuminza transporta pasahero atrobe entrante 1 October 2021, cu viahenan na parti noordoost di Merca pa winter, saliendo for di New York.