Orario di ciere a bira 1 am
ORANJESTAD (AAN): Crisisteam hunto cu Gobierno a anuncia diahuebs anochi algun cambio pa loke ta maneho di Covid-19 na Aruba. Mirando e cifranan y e situacion na Hospital por bisa cu ta saliendo for di e di 5 ola y pa e motibo ey, Prome Minister Evelyn Wever-Croes, despues di a duna un resumen di e cifranan actual, a bay over na anuncia flexibilisacion di algun medida cual ta parti di e strategia di salida.
El a enfatisa cu no ta hustifica mas pa mantene medidanan stricto, ni medica ni huridicamente. Abo mester cuida bo mes y bo famia. Mester keda pone enfasis si riba higiena, distancia fisico y uzo di tapaboca paden, cual ta keda obligatorio.
Un apelacion a bay na e companianan pa sigui aplicae protocolnan aki.
Pa loke ta e cambionan, esakinan ta drenta na vigor entrante 4 Februari, 12:01 am:
- orario di ciere: ta cambia di 12:00 am pa 1:00 am. Casino: 2:00 am.
- cantidad maximo di hende na mesa den HORECA: 10 hende
- encuentro social: pafo maximo 500 persona y paden 300. Ta depende di cuanto espacio tin.
- entretenimento: bandanan musical por ta completo riba escenario. Prohibicion di baile ta wordo kita.
Esaki ta cambionan mas importante, e mandatario a bisa. Tin un lista completo cu ta wordo publica.
Locual ta keda na vigor: maneho di entrada na Aruba, tapaboca ta keda obligatorio paden, distancia fisico y orario di ciere.
Prome Minister Wever-Croes, sinembargo, no ta satisfecho cu e grado di vacunacion. Riba 12 aña, falta ainda 71 mil persona pa busca nan booster.
Un apelacion ta bay na henter comunidad pa vacuna. Gobierno ta dal un stap dilanti den flexibilisacion, pero tur ciudadano mester cuida. Pesey vacunacion ta importante.
Haya omicron na lugar di vacuna ta un riesgo, principalmente si bo tin un condicion medico. Aruba tin e posibilidad di vacuna y mester probecha e oportunidad aki, e mandatario a remarca.
