Segun historia e Indian Mericano ta famia di e Ruso na Siberia --- *Proximidad cu Venezuela ta permiti spionahe Ruso na Colombia? --- *Un mundo den tension ta sigui un confrontacion cada rato mas serio
ORANJESTAD (AAN) — Kico lo pasa awe na mundo? Esaki tabata e pregunta grandi mientras e dia di ayera a alcansa anochi.
Mas y mas mundo a cuminsa papia di e resultadonan di un guera mundial entre dos pais, cu realmente ta bisiña di otro.
Mientras e crisis di Ukraine tabata avansa, mundo a cuminsa realisa cierto asuntonan cu cual e no a ocupa su mes pa hopi tempo.
Uno di nan ta e pregunta si e Indian Mericano y e Ruso tin mes descendencia.
Ora mira e mapa di mundo, por mira con na loke ta wordo considera e “fin di mundo” na Polo Norte, Merca y Rusia ta na un distancia hopi cerca di otro na e estado di Alaska.
Segun teoria e Indian Mericano pues y e Ruso na Siberia por ta famia di otro.
Esaki sigur no a bini dilanti na momento cu Merca y Europa tabata sigui amenasa Rusia cu sancion, di cual Rusia tabata haci bofon.
Mientrastanto na Ukraina un sistuacion dramatico tabata sigui desaroya en espera di e posibilidad cu e pais lo keda den man di tropanan Ruso cualkier momento.
Anciano y mucha a wordo mobilisa na Ukraine, mientras na tur pais na mundo e tension a bira realidad den e forma cu tur pais tambe tabata duna sosten na un banda of otro.
Den vecindario directo di Aruba por a nota cu na Colombia mas y mas informacion tabata drenta di inseguridad cu tabata sinti relaciona cu e hecho cu tabata tene na consideracion cu Rusia por a practica spionahe contra Colombia haciendo uza di e frontera directo entre Venezuela y Colombia.
Prijsnan a cuminsa subi mundialmente hunto cu prijs di petroleo mientras paisnan cu tabata depende di Rusia pa parti importante di petroleo y gas, manera Merca y un gran parti di Europa, tabata na careda.
Mas menasa di medida contra Rusia tabata sigui wordo lansa ayera den horanan di anochi mientras bista tabata dirigi tambe riba tur pais cu tin relacion cu Rusia.
DIARIO tabata sigui tambe pues e desaroyonan den Oceano Pacifico, cu ta parce zona lubida pero caminda costanan di Alaska, estado Mericano y Rusia ta enfrenta otro.
Rusia un tempo hasta kier a uni su mes na e Estadonan Asiatico pa motibo di su posicion geografico den Oceano Pacifico.
