Proceso logistico a conoce un kiebro a partir di Covid - *Prijs pa transporte di containernan a subi barbaramente
ORANJESTAD (AAN): For di aña pasa, ora cu e pandemia di Covid a inicia a haya sa di e problemanan cu tabata tin na nivel comercial pa loke ta e tema di importacion y exportacion di productonan.
Esaki parce ta un tema cu ainda ta vigente na nivel global. DIARIO a tene un entrevista cu un conocedor di e tema na nivel internacional, Luis Diego Cordero, y el a bisa cu e cadenanan di abastecimento desde cu Covid a haci su aparicion a kibra y esaki a provoca un daño den e procesonan logistico di e companianan di transporte (freight).
Por ehempel, ora cu India (cu ta un exportador grandi) a bay den lockdown y cu a blokia tur e exportacionnan di materia prima pa China, China a stop di haya no solamente materia prima, pero tambe containernan.
E companianan tin mester di e containernan cu ta bay di India pa China. E mesun containernan aki, China ta saca nan cu productonan pa Latinoamerica y for di otro paisnan manera Costa Rica, Guatemala of cualkier otro pais ta tuma nan y ta hiba nan pa otro region, e experto a bisa.
E proceso logistico aki ta conoce un kiebro a partir di Covid y e companianan a pasa den un proceso hopi dificil pa por a recupera for di dje.
Sinembargo, a remarca, mester menciona cu esaki tambe a sirbi di excuus pa eleva e tarifanan na nivelnan mas halto. Por ehempel, un aña y mey pasa un transporte (fleet) di Asia pa Centroamerica tabata costa 3 mil dollar pa un container di 40 pia y awendia esaki ta costa 20 mil dollar.
Esaki ta impactando e economia di un manera impresionante y no ta tur ta den posibilidad di importa aworaki. E situacion ta critico y caotico y pa e motibo ey hopi compania ta cerando nan porta pasobra nan no por sostene e situacion aki, Cordero a indica.
Banda di esaki, tin productonan cu ta hopi sensibel na e transporte y por papia akinan di productonan barata cu ta haya complicacion pa realisa e importacion.
El a splica cu tin mercadonan cu ta pagando mas cu e mercadonan latinoamericano. Por ehempel Merca, Mexico y Europa ta pagando 22 mil dollar pa un container y esaki ta haci cu e companianan di carga ta preferi manda carga na e paisnan aki, cu manda na e otro paisnan cu ta paga menos pa e mesun container.
E situacion aki a afecta e importacionnan ya cu e fabricanan no tin materia prima pa produci ya cu e produccionnan ta mas limita. Akinan por referi na entre otro piesanan (parts) unda esnan cu ta bende of produci e productonan no tin e materia prima. E ta un cadena, a remarca.
El a aclaria cu e cadenanan di abastecimento a wordo corta of limita pero esey no ta excuus pa den un aña of mas no atende cu e pedido di algun mercado.
E procesonan ta sigui tuma lugar, a enfatisa, y esaki ta pasa na practicamente tur pais unda e piesanan (parts) ta sigui yega cu menor frecuencia y cu mas dificultad, pero ta sigui yega.
Den tur esaki por surgi e situacion unda un agencia importador por uza e asunto aki como pretexto pa busca un hustificacion relaciona cu e tardansa of ausencia di pedido. Posibelmente, tambe por sosode casonan unda ta comete abuso cu prijs, a expresa.
