BRUSELAS: Costa Rica a wordo poni awor riba e blacklist di Union Europeo, como un pais cu no ta cooperando den asuntonan di impuesto,
y esey a bira un realidad cu un votamento di e Ministronan di Finanzas di e paisnan miembro na Europa.
E decision a bin despues cu e Grupo di Codigo di Conducta di Union Europeo a recomenda pa inclui Costa Rica riba e lista, debi cu el a fracasa di cumpli cu e promesa haci door di Gobierno anterior pa reforma e sistema di impuesto, cu e meta pa por cobra impuesto riba entradanan pasivo di offshore prome cu 31 December 2022.
Segun lineanan di guia di Union Europea, e ganashi pasivo genera pa un persona of negoshi den exterior mester worde cobra belasting na Costa Rica pa evita “competencia inhusto” entre e regimennan fiscal di e paisnan y garantiza e entrada liber di impuesto.
Gobierno di e actual president Rodrigo Chaves, a splica cu loke lamentablemente a pone Costa Rica wordo poni riba e lista ey ta bin debi na decisionnan haci door di gobierno anterior di Carlos Alvarado.
Costa Rica awor ta bisa cu tempo cu Sergio Alfaro Salas a bira representante di Costa Rica na Union Europeo durante gobierno di Carlos Alvarado di 2018 pa 2022, Ministerio di Comercio di Exteriores a wordo exclui di e combersacionnan aki cu tabata ser teni cu Union Europeo.
Alfaro y ex-Ministro di Finanzas, Elian Villegas Valverde a discuti e reformanan di impuesto cu autoridad di impuesto di Costa Rica. Na April 2022, Ministro Villegas Valverde a priminti un ley cu ta establece impuesto riba entrada pasivo extrateritorial pa 30 di Augustus 2022, y Asamblea Legislativo lo aprobe prome cu 31 di December 2022.
Pero nan no a informa ni e sector comercial ni e Asamblea Legislativo di loke ta pasando. Costa Rica a core pidi pa renegocia y trata di haya prolongacion pa e deadline, pero tur esaki a wordo rechaza, debi cu Gobierno anterior ya a haci tur e promesa necesario caba.
Pues pa awor, tanten cu e regimen di entrada pasivo di offshore no wordo cambia pa ley, Costa Rica lo keda riba e blacklist.
