Costa di Aruba ta yen sargassum

ORANJESTAD (AAN):   Den fin di siman por a ripara cu e costa noord di Aruba a cuminsa yena cu e yerba conoci como sargassum (seaweed).

Esaki sigur lo ta algo cu lo keda te fin di e temporada di horcan. segun expertonan.

Henter Caribe ta hayando sargassum. Bonaire y Corsow ta den e mesun situacion. Y ta premira cu e cantidad lo sigui aumenta den e dianan aki.

Por a mira for di colaboradornan na Bonaire, cu tur mainta tin un grupo di boluntarionan cu ta bay saca Sargassum na Sorobon, por ehempel.

Informacion for di otro añanan ta indica cu e presencia di sargassum a wordo detecta cu mayor frecuencia den Caribe for di 2011.

Esaki ta un fenomeno cu ta afecta e recursonan marino, pesca, beach como tambe turismo, ya cu si ta haya e sargassum den cantidad grandi, e beachnan ta cuminsa yena cu e yerba aki dunando un mahos bista tambe.

Segun daonan, na 2014 y 2015 e sargassum den masa a yega Caribe bek.

Semper a tuma nota cu den e caso aki, Departamento di Naturaleza y Medio Ambiente (DNM) ta sigui di cerca e fenomeno aki.

Te cu awor no a raporta kehonan relaciona cu presencia abundante di sargassum den e beachnan, ya cu tin posibilidad cu e yerba ta concentrando den e costa noord di Aruba, locual no tin un impacto directo riba e usuarionan di e beachnan y ya cu esaki ta un fenomeno natural y no ta presenta ningun daño pa e salud publica, no lo mester tuma medida al respecto. 

Kico ta sargassum? 

E sargassum ta un alga color berde/bruin comunmente conoci como yerba di lama of alga marino cu ta drief riba e superficie di lama.

Nan ta wordo mira cu frecuencia na lama Atlantico na e asina yama Sargaso Sea y ta move cu e corientenan oceanico.

E alga Sargassum ta hopi muy importante pa e especienan migratorio y ta un habitat pa mas di 120 especie di pisca y otro 120 especie manera tortuga, shrimps, squids, etc.

Den caso cu e Sargassum cuminsa aparece riba e beachnan popular rond di Aruba y si nan tin mas di 3 cm di hanchura, e ora lo ta bon pa  DNM (584-1199) of Bureau Rampenbestrijding Aruba  (588-0100).