CARACAS: Corte Superior na Venezuela a confirma e castigo largo di prison contra seis ehecutivo di e refineria Mericano Citgo, riba acusacionnan di corupcion.
Corte Superior no a duna detaye riba e decision cu ta mantene den prison e ex-ehecutivonan aki cu a wordo sentencia na November 2020.
E Tribunal asina a confirma e sentencia di Corte di Prome Instancia na Caracas.
Abogado di e ehecutivonan a bisa cu nan tabata spera e decision ey, ya cu e seis personanan aki di Citgo ta wordo usa como un placa di garantia pa cu e tema politico entre Merca y Venezuela.
E ex-president di Citgo, José Pereira ta sintando un castigo di 13 aña y 7 luna den prison, y a haya un multa di 2 miyon Dollar. E cinco otro ex-Vice Presidentnan José Luis Zambrado, Alirio José Zambrano, Jorge Toledo, Tomeu Vadell, y Gustavo Cardenas a wordo condena na 8 aña y 10 luna den prison.
E seis funcionarionan aki di Citgo, di cual tur ta Venezolano pero algun cu doble nacionalidad Mericano, a wordo aresta na November 2017 ora cu nan a wordo yama pa un reunion na oficina na Caracas di PDVSA, cu ta doño di Citgo.
Pereira a wordo acusa di encubrimento, di soborno di un funcionario cu contratista pa por comete un acto criminal, mientras e otro ex-Vice Presidentnan a wordo condena pa delitonan di soborno di un funcionario.
Manera ta conoci, den pasado caba Merca a pidi libertad di e grupo.
