Contratista a fayece tragicamente cortando mata riba Avenida Nelson Orlando Oduber

Herment lo a mishi cu wayanan di coriente

ORANJESTAD (AAN): Cualkier trabao cu ta involucra coriente ta peligroso, esnan cu ta traha cu coriente semper mester tuma precaucionnan necesario pa mitiga riesgonan.

Diamars mainta, un caso sumamente tragico a sosode pazuid di ex-House of Chang, riba Avenida Nelson Orlando Oduber, na unda coriente a dal un persona.

            Central a manda polis y ambulance mesora na e lugar y na nan yegada nan a haya un persona administrando CPR na un trahado cu tabata corta matanan rond di e waya di coriente.

            Segun informacionnan, e victima ta traha pa un compania cu sa haci trabao di corta matanan riba caminda. Aparentemente na momento cu e victima tabata cortando matanan cerca di e wayanan di coriente, su herment a mishi cu e wayanan.   

            Dos ambulance a yega pa duna asistencia y reanima e persona, pero no por a haci mucho mas.

E victima a wordo identifica como Patrick A. Thode di 58 aña di edad.

            DIARIO ta manda palabranan di condolencia na famia y amigonan.