Conocido Natalie Lin a fayece despues di un bataya intenso cu malesa di pulmon

ORANJESTAD (AAN): Ultimo decada el a lucha hopi no djis pa su derechonan, sino a hiba un bataya fuerte pa e por sikiera hala rosea cada dia di bida. 

Pero Diaranson mainta el a perde e bataya, y awor cantidad di famia- y amigonan rond di Aruba ta yora e fayecimento di e dama Natalie Nicole Lin.

   Natalie a bira hopi conoci den mundo di deporte, di mezcla di musica, y circulo social den decada di 1980, sigui pa 1990.  E ta conoci como un di e yiunan di defunto Docter Theo Lin, cu tabata activamente riba varios tereno.

   Un dama semper ‘hyper’ y cu amor pa crea amistadnan nobo, e tabata un persona cu ta asina social como cu semper e ta percura bon pa su amigonan.

   Sinembargo den e siglo nobo aki el a bin ta sinti problema pa hala rosea.  Ora di a bay haci chekeo specializa riba su pulmonnan, a bin diagnostica cu e ta sufriendo di loke na ingles ta wordo yama “End-Stage COPD”.

   COPD ta loke ta ser yama ‘Chronic Obstructive Pulmonary Disease”, cu ta laga e pashent haya problema frecuente di hala rosea corectamente.  Den e ‘End-Stage”, e sintomanan ta empeora y cada biaha cu tin un flare den condicion, e por nifica fin di bida.

   E dificultad aki di hala rosea, a pone cu Natalie no por a sigui mas cu e bida activo, pasobra e ta obliga di cana awor tur caminda cu boter di oxigeno.  Como cu e malesa di pulmon ta sigui empeora, cu sosten di su tata, a haya sa di tratamento experimental usando ‘stemcell’ na un Hospital specializa na Tampa, Florida (Merca).

   Natalie a haya shock di su bida, ora el a haya sa cu como cu e ta algo ‘experimental’, cu e no ta wordo trata pa AZV.  Esaki a pone cu el a haye ta bay pa Plan-B, y esey ta pa recauda fondo pa por haya e placa pa haci e viahe y e tratamento.

   El a cuminza bende su aparatonan di DJ di musica di pasado, a cuminza bende USB-Memory Stick cu musica di 1980, y tambe spañonan di 1970.  Tur esaki pa haya placa pa haci e viahe.

   El a haci esey na numeroso ocasion pa Tampa, y e tabata sinti cu e ta hayando mihor alivio.

   Sinembargo despues su querido tata Dr. Theo Lin a fayece, y a perde e persona cu tabata apoy’e.  Toch e no a laga esey strobe di sigui cu su lucha.

   Comienso di e aña aki a bin ripara cu e tin di wordo opera pa haci coreccion na parti di su pulmon.  Na April di e aña aki, AZV a informa Natalie cu nan lo mande pa Hospital di Valle del Lilli na Cali.  Esaki tabata un hopi bon noticia.  Mesora Natalie a core recauda fondo via di su fundacion yama ‘Stichting Yudami Hala Rosea’ pa por cera e suma di 1.000 Florin pa e por a paga pa un acompañante, seguro di viahe, y pa su cacho stima Chuckie por keda cerca un Doggie-sitter.

   Natalie tabata un bon amigo, un “persona di tur hende”, y aunke e ta sufriendo di su malesa, e tabata comunica cu amigonan cu e ta mira ta “down” of “depresivo” pa cualkier motibo, y e ta combersa, papia, y trece animo cerca e personanan aki.  Natalie tabatey pa yuda tur hende hisa cara bek na laira y goza di bida.

   Pero Diaranson mainta, el a haya su ultimo rosea y a bay laga awor bunita memoria atras.  Nicole Natalie Lin tin 53 aña di edad.  DIARIO ta manda condolencia na henter famia y su amigonan.