‘Compagnie in de West’ di Defensa den Region Caribe Hulandes ta pasa su rotacion

ORANJESTAD (AAN)/Willemstad:  Durante un ceremonia militar riba Dialuna 1 di juli 2024,

‘Compagnie in de West’ Rotacion 45 a pasa su tareanan pa e siguiente unidad, Rotacion 46. E Comandante nobo, Capitan Jeffrey di e Batayon di Infanteria 13 di Assen, a reemplaza su antecesor Capitan Bernhard, pa medio di e tradicion ‘peddeloverdracht’, cu ta transferencia di e rema, na Capitan Bernhard.

   Capitan Bernhard ta mira bek riba un periodo intensivo y special: “Como unidad nos tabatin un tempo util y na unda nos a siña hopi. Na tur momento nos tabata para cla pa ser desplega.  Asina riba peticion di socionan local  nos a keda ubica den e cuadro di  operacionnan anti-droga, nos a sostene varios actividadnan pa bon causa, na Boneiru, y nos elemento EODD (Explosieven Opruimingsdienst Defensie) a keda desplega varios biaha pa elimina explosivonan y train socionan local. 

    Banda di esey, nos a inverti continuamente den nos propio ubicacion mediante organisacion di cursonan di formacion cu hopi reto. Den esaki nos a traha intensivamente hunto cu militarnan di Corsou, un periodo, na unda nos ta mira bek cu hopi positivismo. Nos a sinti masha bonbini riba e pida special aki di nos Reino’’.

     Capitan Jeffrey ta anticipa pa durante e cuater luna venidero, nan lo train hunto cu e ‘Alfa Demonen Compagnie’ reforsa cu specialistanan y pa traha den region Caribe. “Aunke tin hopi experensia presente den e grupo di ehecutivonan, tanto riba tereno di misionnan como na rotacionnan anterior den Region Caribe Hulandes, esaki pa un cantidad di militar ta prome biaha cu nan ta keda pa tempo largo for di cas.

      E periodo venidero lo wordo usa pa mehora nos labor bao circunstancianan climatologico pisa. Pa nos ta un chens unico pa desaroya y reta nos mes. Banda di e ehercicionan, e Compagnie tambe ta cla pa sostene habitantenan di Region Caribe den cualkier calamidad, na unda nos presencia ta necesario”, segun Capitan Jeffrey.

 “Compagnie in de West’ (CidW), Tropanan den West, ta un unidad cu ta forma parti di Ehercito Real cu, bao di dominio di (Commandement der Zeemacht in het Caribisch Gebied) CZMCARIB, por keda desplega pa un variedad di tarea. E cuater luna venidero e Compagnie ta train na Aruba, Boneiro y Corsou.