Como 350 kg di Cocaina haya na estado Falcon a yega di Colombia

PUNTO FIJO: Un cargamento di 293 paki di cocaina cu a wordo haya na costa banda pariba di estado Falcon, na sector Cumariche di municipio Acosta, a bin for di Colombia.  Esey ta loke autoridadnan a bisa durante un conferencia di prensa.

   E droga aki a pisa 351 kilo, y nan a intercepta esaki danki na e trabao di inteligencia di Unidad Antidroga di Guardia Nacional Bolivariana.  Nan ta mira cu costa di estado Falcon ta wordo usa pa traficantenan Colombiano pa traslada e droga aki cu na final tin meta pa yega sea Merca of Europa.  Nan no kier pa Venezuela sigui fungi como trampolin pa cocaina. 

   A ser splica cu esnan cu tabata responsable pa e droga a huy, pues detencion no a cay.  Sinembargo awor Forza di Armada Nacional a uni cu e cuerponan di seguridad, y nan ta tras di pista di e cartelnan aki cu ta operando den teritorio Venezolano.

   El a bisa tambe cu e trabaonan di tracing ta sigui den e zona, pasobra cu no ta descarta cu tin mas droga scondi den e area.

   Durante 2021 nan a logra di dal un golpi duro na narcotrafico Colombiano y a confisca y kima mas di 3.933 paki di cocaina y tambe marihuana.