Comite Olimpico Arubano a presenta ‘The Paris 2024 Wall’

Cu aprecio grandi pa nos atletanan Olimpico

ORANJESTAD (AAN): Den oranan di atardi den compania di algun di nos atletanan Olimpico cu participa na Paris 2024, hunto cu nan respectivo federacion nacional y famia, a celebra e bunita momentonan di e ultimo Weganan Olimpico.

   Presente durante e evento aki tabata Shanayah Howell di BMX Racing, Mikel Schreuders di natacion cu awor ta un “Three time Olympian” y nos atleta cu mas a destaca na e Weganan, obteniendo Aruba su prome Diploma Olimpico den historia, esta Ethan Westera den e disciplina di Olympic Windsurfing.

   Durante e atardi special aki, a desvela e actualizacion di nos “Uniform Gallery”, cu awor tin e uniforman deportivo nobo cu a ser estrena na Weganan Olimpico di Paris 2024, hunto cu e trahenan di Ceremonia cu e delegacion di Aruba a bisti durante e ceremonia di apertura cu a tuma luga riba boto den e riu di Senne na Paris, Francia.

   Banda di esaki, tambe a desvela e potretnan nobo, cu awor ta inmortalisa nos atletanan riba nos “Olympian Wall”, asina acompañando e otro atletanan cu a logra yega e escenario mas grandi den e mundo di Deporte. Por ultimo, a celebra e “Paris Wall”, cu ta conta cu imagennan di e poster oficial di Paris 2024, otro imagennan di e delegacion di Aruba, e antorcha di e Weganan y finalmente, un copia di e Diploma Olimpico, unda Ethan a firma esaki, asina personalisando e copia aki pa tur hende por mira ora di bishita COA.

   Pa finalisa e anochi, a celebra tur e logranan di Aruba den e ultimo Ciclo Olimpico, cu tabata esun mas exitoso den historia di Aruba, y a pone e reto na tur hende pa sobrepasa esaki y traha pa nos prome medaya Olimpico, pa e siguiente Ciclo Olimpico.