Comision Fiho di Relacion di Reino a haya presentacion di Aruba su finanza publico

Tweede Kamer

ORANJESTAD (AAN): Riba e promer dia di trabao di Minister President y Minister di Finansa na Hulanda, e mandatarionan a reuni cu Parlamentarionan Hulandes cu ta miembro di e Comision Fiho di Relacion di Reino di Tweede Kamer pa asina brinda e presentacion di Aruba su finansa publico.

   Como cu den e Comision aki di Tweede Kamer ta trata topiconan cu ta relevante pa gobernacion di Pais Aruba, ta importante pa su miembronan por ta na altura di e situacion financiero di Aruba. E ta necesario tambe pa nan por worde poni na altura di tur esfuerso cu ta worde haci na Aruba pa por recupera stabilidad financiero despues cu e pandemia a afecta nos Pais su economia y finansa publico.

   Den e presentacion titula 'Aruba terug op 't goede spoor,' a brinda e Comision un bista financiero di Aruba na man di algun indicator financiero y tambe a repasa algun mito cu ta existi brindando e informacion corecto basa riba e hechonan. Por ehempel, e mito cu Aruba no ta cumpli cu normanan financiero acorda cu Hulanda, cu Aruba no a baha gasto di personal, cu Aruba ta subi gasto y belasting so, tur a worde descarta mustrando y ilustrando e cifranan corecto al respecto.

  Durante e presentacion a bin varios pregunta dilanti cu a keda contesta na satisfaccion. E Parlamentarionan presente tabata gradici di por a haya e informacion presenta y e oportunidad pa por a intercambia cu e mandatarionan y expertonan di Aruba. Na final e Presidente di e Comision señora Mariëlle Paul a expresa cu e encuentro ta masha aprecia ya cu asina nos ta haya momento pa papia cu otro, envez di papia riba otro.