Comienso di temporada cu mas ambiente na Merry Merry Marketplace

ORANJESTAD (AAN): Prepara bo mes pa un temporada di fiesta unico, ya desde Diabierna 8 di December te cu 6 di January cu Merry Merry Marketplace.

Cu un alineacion di evento amplio y banda musical tur anochi riba e stage dilanti di Cafe the Plaza. Esaki ta e ’place to be’ pa celebra e alegria di e temporada di fin di aña.

   Merry Merry Marketplace a cuminsa Diabierna caba, y awe Diasabra dia 9 di December, Empower Arts Aruba lo bay tin un show di baile di muchanan, presentacion di Robert Jeandor y su solo banda show. Santa Claus tambe lo ta presente pa saca potret cu tur presente.

   Merry Merry Marketplace ta invitabo pa cuminza e temporada di fiesta di fin di aña cu nos famoso skate court banda di e stage na Cafe the Plaza. E skate court lo ta habri tur dia di 6:00 pm te cu 10:00 pm pa un prijs atractivo.  E aña aki lo entrega tur contribucion di nos skate court na Luna Foundation. E fondo colecta lo aporta na un bus pa sterilisa cachonan, cual lo bishita diferente barionan, sigur lo haci un impacto positivo riba bienestar di animalnan den nos comunidad.

   No perde e oportunidad aki pa celebra e dianan di fiesta na Merry Merry Marketplace huntu cu bo famia, amigonan y disfruta di nos restaurantnan, barnan of tiendanan.