ORANJESTAD (AAN) – Durante e reunion entre Comite Olimpico Arubano y Minister Presidente y Formador Evelyn Wever-Croes, e Secretario General di COA, Nicole Hoevertsz a pidi e dignatario
y su team, pa e gobierno cu ta bay forma, considera pa crea un plataforma di Deporte, unda cu sector publico (entidadnan di gobierno) y sector priva cu ta e asociacionnan civil manera Comite Olimpico Aruba, Aruba Sport Unit, y tur e federacionnan deportivo nacional y clubnan di deporte, por topa otro pa discuti cierto temanan di interes comun.
E dama a subraya cu na dado momento mester yega na un maneho nacional di deporte. “COA ta un organizacion bastante unico, pasobra nos ta bay bek den historia. Nos ta parti di e Movimento Olimpico, cu ta un organizacion mundial cu ta bay bek casi tres mil aña den historia y nos ta un organizacion cu ta wordo dirigi hopi door norma y balornan.
E balornan olimpico (Olympic Values) ta hopi importante pa Comite Olimpico y ta parti di nos funcionamento y operacion tur dia. Mi ta spera cu nos por aporta cu e valornan olimpico ey, hopi mas na comunidad di Aruba”, señora Nicole Hoevertsz a remarca.
El a señala cu e balornan di Comite Olimpico ta hopi simple: Excelencia, respet y amistad, y e ta kere cu si duna mas atencion na e balornan olimpico aki nos por haya un miho comunidad y por logra loke Comite Olimpico Internacional ta para pe, cu ta crea un miho mundo, atravez di deporte.
