Clyde Fuenmayor cuestionando 2 locutor di plama shisheria cu kizas nan a haya for di sea Kramers di Guarda Nos Costa of Paskel di DIMAS

Acusacionnan a wordo desmenti --- ORANJESTAD (AAN)- Algun hende a keda sorprendi, cu un informacion cu tabata den poder di solamente personal di Corte di Husticia,

como tambe Departamento di DIMAS, y Departamento di Guarda Nos Costa (GNC), diripiente a bira un nota di redashi durante un noticiero merdia na radio.

   Diabierna mainta, e inversionista Clyde Fuenmayor a convoca un conferencia di prensa pa duna su banda di medaya riba e redashi cu a wordo transmiti, y e ta cuestiona con bin cu e locutornan di fam Andrade y Paskel a haya e informacion aki.  Siendo cu e datonan aki tabata den man di solamente Hefe Kramers di Guarda Nos Costa, y tambe Hefe Paskel di DIMAS.  Con e detayenan aki a lek asina?

   E inversionista Clyde Fuenmayor tin e establecimento di ‘Envy by Clyde’ na Mon Plaisir.  Di hopi tempo e tabata buscando forma pa haya un persona di confianza traha pe pa maneha e negoshi y inversion.

   Diripiente na October 2018, e hefe Paskel di DIMAS a tene un conferencia di prensa pa menciona e maneho nobo cu Gobierno a introduci pa cu permiso pa inversionistanan.  En corto, e maneho nobo di Gobierno ta cu un inversionista di un negoshi cu tin balor di mas di 1 miyon Florin, tin derecho di busca 1 (un) persona di confianza den exterior pa yuda maneha e empresa.  Un inversionista cu negoshi cu balor di mas di 2 miyon Florin, tin derecho di busca 2 (dos) persona di confianza, etc.  Esaki ta bay te na 5 persona di confianza.

   Como cu e negoshi di Clyde Fuenmayor ta di riba 1 miyon Florin, el a aplica pa por beneficia di e maneho nobo aki cu Gobierno a anuncia.  Pa haci esey, e tin di bay via DPL cu a investiga tur papeleo, documento, y demas informacion di su negoshi.

   Durante un conferencia di prensa, e directora di DIMAS a hasta declara cu e decision pa duna permiso eynan ta depende di conseho positivo cu DPL ta duna.

   CONSEHO POSITIVO: Apenas recien dia 22 di November 2021, despues di investigacion profundo, Departamento di DPL a duna conseho cu Clyde Fuenmayor ta cumpli cu e maneho nobo di Ministro pa cu inversionistanan por trece un persona di confianza (‘vertrouwenspersoon’).  Pues DPL ta duna OK, y Ministro di Labor Glenbert Croes a pone su firma bao di dje riba Diamars 23 di November 2021.

   Despues di esey a acudi na e.o. DIMAS y tambe Guarda Nos Costa pa e proceso sigui cana pa haya e permiso pa e persona di confianza por drenta for di Venezuela.  Aki Clyde Fuenmayor a bin topa cu un actitud hopi raro di e Hefe Kramers, kende ta parce di no ta dunando balor na e documento y ‘positief advies’ aki di DPL.  El a sinti mesun cos for di Hefe Paskel di DIMAS.

   Clyde a splica cu e ta Venezolano biba 30 aña caba na Aruba, y cu su paspoort Hulandes awor e ta percura pa semper e cumpli cu tur regla, ley, impuesto, y permisonan pa por opera.  Pesey el a keda sorprendi pa tende locutornan Andrade y Paskel bay papia cosnan di redashi y incorecto riba e asunto aki.

   “Si boso tin prueba, algun documento legal, si boso tin tur e documentonan aki, mi ta pensa cu boso ta haciendo algo ilegal, pasobra e documentonan aki solamente DIMAS, Corte, of GNC por tin nan.”  E ta kere cu tin di haci un investigacion pa haya sa con informacionnan aki por a leak pa yega na e dos locutornan.

   KRAMERS MENOSPRECIA DPL: Fuenmayor a bisa cu e nunca tin algo contra e dos locutornan aki, y nunca e mes a pidi nan un fabor, como cu semper e gusta bay e via legal y corecto.  El a desmenti cu ex-Ministro Bikker a haci algo pa su persona di confianza (sobrino) a haya permiso.

   Encuanto e dos locutornan, Clyde Fuenmayor a bisa: “E unico cos cu ta haci ta redo, redo, redo, redo, y grita manera porco, pasobra boso no ta papia, sino boso ta grita.”

   Fuenmayor a bisa cu e tin un caso den Corte na comienzo di December tambe.  El a papia tambe con den pasado cada biaha GNC ta pasa su Beauty Salon pa haci control, y den pasado a yega di duna su hendenan un mal trato, y a hasta menciona un caso specifico unda na forma grosero, brutal, y hasta cu forza fisico a wordo haci contra su sobrino.  E ta puntra si acaso Hefe Kramers a lubida esey caba.  Clyde a hasta sinti cu e tin di bay cuminza pone un Lessenaar special pa GNC na su Beauty Salon, cu coffie cla pa cada biaha cu Guarda Nos Costa yega eynan pa controla, y nan lo tin un lugar pa sinta.

   Apenas recien, e Directora di DIMAS, esta Paskel, a bisa cu e permiso di DIMAS ta depende di e decision positivo of negativo di DPL.  E ora, tin un fayo di comunicacion entre DPL y DIMAS?  Pasobra e Hefe Kramers a bisa cu e documento investiga door di personal di DPL y firma pa Ministro Glenbert Croes “no ta sirbi pa nada”.  Kramers pues tin menosprecio pa DPL?

   Fuenmayor ta puntrando su mes si acaso Hefe Kramers di GNC ta kere cu e ta Dios?  Pasobra e tin prueba con un teenager stranhero (cu a siña tur idioma aki, incluyendo Hulandes y Papiamento), e lo kier bay deporta dia 22 di December venidero for di Aruba, sin worry cu e derechonan humano di muchanan, y cu e hoben aki tin 5 aña caba na Aruba.

   Segun Clyde, esaki ta un mal hecho mirando cu tur papel di e hoben ya tabata ‘den proceso’ canando su caminda legal.   Esaki ta full diferente cu un stranhero ilegal cu nunca a entrega formulario, pues tin 0,00% di proceso, etc.  Eseynan si lo ta OK pa deporta pasobra nan no a cumpli.  Pero e plan pa deporta un mucha cu ta siñando y haya les aki, cu su papelnan den proceso?  Esey lo bay ta algo di mala fe door di Hefe Kramers.