Tarifa di Serlimar a cambia:
ORANJESTAD (AAN) – SERLIMAR a yama un conferencia di prensa, den cual Jermaro Emerencia, Relacionista Publico y Marketing Manager, a hiba palabra, y tambe Georxinia Croes, Marketing Assistant.
Jermaro Emerencia a duna informacion, en conexion cu un comunicado di prensa cu nan a saca na Januari ultimo.
Emerencia a splica cu durante e ultimo lunanan SERLIMAR a traha duro pa defini e direccion cu e compania kier a tuma, pa garantiza continuidad, unda nan a inverti den e sistema administrativo, den e trucknan y den personal; e ultimo aña nan a tuma un decision cu nan mester bay hisa tarifa pa por sigui cu e continuidad di e compania.
“A base di un begroting nos a presenta na e minister y na December ultimo esaki a wordo aproba anto e tarifanan nobo ta bay bira 28 florin pa un bari di 240 liter y si tin dos bari ta bira 38 florin”, Emerencia a duna di conoce.
El a agrega cu e facturanan ta saliendo y e clientenan ta hayando esaki caba. Na principio tur factura ta bin comosifuera tur hende tin dos bari, pero ta bay keda na e cliente pa notifica na SERLIMAR si e tin un of dos, y e compania lo controla e cliente pa wak si ta asina, pa adapta den nan sistema e tipo di cobranza cu cada cliente mester haya.
“Tambe nos kier a bisa cu e tarifa di 25 florin nos no por carg'e mas como compania. Ora nos haci nos budget, realisticamente nos ta hopi abao; nos no por cubri nos operacion, pues e ta algo cu kizas pueblo ta puntra con nos a yega na e decision aki, pero esaki ta despues di hopi research, anto estudionan cu nos a haci e ultimo dos añanan, cu a cuminza yega na e prijs aki, cu ainda ta bao di nos competencia y cu ainda ta algo hopi competitivo”, Jermaro Emerencia a declara.
El a agrega cu SERLIMAR a inverti den su añanan di servicio, y si compara e compania awe cu diez aña pasa, nos tabata tin alomenos 100 keho pa dia; actualmente, tin solamente dos, tres of cuater keho.
“Aworaki nos a drecha nos sistema administrativo. Nos a bay cu un compania cu ta hopi mas eficiente, invoicenan ta sali hopi mas lihe, y nos sa cu esey ta e ultimo stap cu nos mes a tuma. Mi kier corda tur hende cu no ta pasobra bo tin tres of cuater bari, e ta keda 25 florin”, Emerencia a indica, reiterando cu e tarifa pa 1 bari ta bira 28 florin y 38 si tin dos bari. Si e cliente tin tres bari e ta yega pa un tarifa comercial caba, anto e mester bay Serlimar cera un contrato comercial cu e compania, pa mas di dos bari.
