Citgo a registra ganashi record di 2.800 miyon Dollar

Compania mes a divulga esaki

• Nan a usa e placa pa paga debe y paga dividendo
• Ganashi danki na demanda fuerte y tarifa halto pa gasolin 

HOUSTON: E refineria Citgo Petroleum Corp. a raporta Diahuebs siman pasa un ganashi netto record di 2.800 miyon Dollar pa 2022, danki na e demanda fuerte di combustible pa motornan, e margennan halto y produccion di refinamento cu a supera e capacidad stipula di su refinerianan.  E 2.800 miyon Dollar na Merca ta wordo describi como “2.8 billion Dollars”.

   Recuperando asina di un perdida di 160 miyon Dollar na 2021, y dos aña consecutivo di perdida, e resultadonan di aña pasa tambe a sobrepasa e pronostico anterior di e compania aki di cual su sede principal ta na e ciudad aki di Texas na Merca.

   E ganashi den henter e sector di refinamento na Merca, a subi aña pasa pareu cu e prijs di combustible tabata subi considerablemente debi a e recuperacion economico awor cu e Pandemia di Covid-19 a finaliza, y e scarcedad mundial di combustible cu a wordo ocasiona ora cu Rusia a invadi Ucrania.

   E ganashi netto di e di cuatro trimester tabata di 806 miyon Dollar, compara cu e 21 miyon Dollar di e mesun periodo di un aña prome.  E ganashinan prome cu interest, belasting, y depreciacion pa e ultimo trimester tabata 1.200 miyon Dollar, compara cu e 139 miyon Dollar di un aña pasa.

   E ganashinan solido di aña pasa, a pone cu Citgo a logra paga su debe di 1.100 miyon Dollar, y paga dividendo tambe na e compania madre, Citgo Holding, cu a wordo usa pa reduci su dede na 489 miyon Dollar, segun e compania a declara.

   Citgo mes, tabata wordo controla pa e compania PDVSA di Venezuela, pero na 2019 a corta lazo cu e gobierno di Nicolas Maduro ora cu Merca a impone sancionnan economico estricto riba e pais Sur Americano.

   E resultadonan ta refleha “un base solido di excelencia operacional y comercial, bon supervision di administracion y seguridad,” ta loke president Carlos Jordá a bisa den un boletin.

   E tres refinerianan di Citgo a opera na nivelnan record di produccion den di cuatro trimester.  Nan tres a procesa un total combina di 797.000 bari pa dia (bpd) di petroleo crudo den e ultimo trimester, cu ta un tasa di utilizacion di 104%.